Alþjóðaheilbrigðisstofnunin fær ekki sjálfkrafa völd hér á landi með samþykkt reglugerðarbreytinu á farsóttarsáttmálanum heldur er það Alþingi sem að lokum setur lög til þess að uppfylla þau viðmið sem WHO setur á heimsvísu. Þetta var meðal þess sem fram kom í máli Björns Leví Gunnarssonar þingmanns Pírata í viðtali við Arnþrúði Karlsdóttur.
Björn segir að það sé Alþingis að ákveða hvort og hvernig uppfylla eigi þau viðmið sem WHO setur. Þannig verður viðmið WHO ekki bindandi fyrr en Alþingi hafi sett lög þess efnis. Hann segir að þetta sé sett upp á svipaðan hátt og Barnasáttmálinn. Hann bendir á að Bandaríkin hafi til dæmis ekki samþykkt Barnasáttmálanna þar sem þau standi fast á því að uppfylla í alvöru þær kröfur sem gerðar séu í þeim samningum sem undirritaðir eru. Það séu önnur lönd sem undirriti Barnasáttmálann en uppfylli hann ekki og það sé ekkert gert gagnvart þeim ríkjum þar sem þetta sé aðeins leiðbeinandi viðmið.
Alvarlegar breytingar í frumvarpi um sóttvarnarlög
Arnþrúður bendir á í því sambandi að frumvarp um breytingar á sóttvarnarlögum sé búið að vera lengi í vinnslu á Alþingi en frumvarpið feli í sér gjörbreytingu á þeim lögum sem eru í gildi núna. Frumvarpið beri með sér að Íslendingar séu ekki að fara að stjórna sínum sóttvarnarmálum sjálfir og verið sé að framselja vald til WHO. Með því sé verið að veita WHO allsherjarvald í sóttvarnarmálum á Íslandi.
Björn er ósammála því og segir að þetta sé eins og með alla aðra samninga Sameinuðu þjóðanna og segir að Mannréttindasáttmálinn sé til að mynda ekki bindandi fyrir öll þau ríki sem undir hann hafi skrifað.
Ósammála um eignarhaldið á WHO
Hvað varðar aðkomu lyfjarisanna að WHO segir Björn að honum vitandi eigi Lyfjarisar ekki hlut í WHO en viðurkennir að þeir hafi mikilla hagsmuna að gæta og stundi mjög mikinn lobbýisma.
Arnþrúður bendir á að eignarhald lyfjarisanna í WHO sé staðreynd og slái fólk talsverðum óhug. Stofnunin þrýsti á aðildarríkin að setja lög sem sniðin séu að hagsmunum lyfjarisanna. Verði frumvarpið að lögum geti WHO fyrirskipað að láta rista skurð á húð og sprauta fólk með framandi efnum þegar þeim dettur í hug. WHO geti lýst yfir faraldri ef þeim sýnist svo og látið handtaka fólk með aðstoð lögreglu ef fólk sýni mótþróa.
Hlusta má á afar fróðlegar umræður um WHO í spilaranum hér að neðan
