Alþingi samþykkti í dag frumvarp dómsmálaráðherra sem herðir skilyrði fyrir námsmannaleyfum og breytir fyrirkomulagi við afgreiðslu atvinnu- og dvalarleyfa. Markmiðið er að draga úr misnotkun námsmannaleyfa og færa íslenskt regluverk nær því sem tíðkast á öðrum Norðurlöndum.
Dómsmálaráðherra segir breytingarnar vera fyrsta skrefið í umfangsmeiri endurskoðun á dvalarleyfakerfinu.
Krafa um námsárangur
Með nýju lögunum þurfa námsmenn reglulega að sýna fram á fullnægjandi námsárangur til að halda dvalarleyfi sínu. Breytingin kemur í kjölfar þess að yfirvöld hafa bent á óvenju mikla fjölgun námsmannaleyfa á skömmum tíma og talið að kerfið hafi að sumu leyti verið rýmra en í nágrannaríkjunum.
Fjölskyldusameining takmörkuð
Reglur um fjölskyldusameiningu verða einnig hertar. Framvegis verður hún bundin við maka og börn námsmanna, líkt og víða er gert á Norðurlöndum. Jafnframt verður dvalarleyfi til atvinnuleitar eftir útskrift stytt og diplómunám mun ekki lengur veita rétt til atvinnuþátttöku eða fjölskyldusameiningar.
Einn staður fyrir atvinnu- og dvalarleyfi
Lögin fela einnig í sér breytingar á stjórnsýslunni þar sem afgreiðsla atvinnu- og dvalarleyfa verður færð undir eina stofnun, Útlendingastofnun. Markmiðið er að einfalda umsóknarferlið, stytta afgreiðslutíma og auka yfirsýn yfir málaflokkinn.
Segir breytingarnar stemma stigu við misnotkun
Þorbjörg S. Gunnlaugsdóttir dómsmálaráðherra segir breytingarnar ætlaðar til að koma í veg fyrir að námsmannaleyfi séu notuð í öðrum tilgangi en námi. Hún leggur áherslu á að erlendir námsmenn séu áfram velkomnir til landsins en að mikilvægt sé að tryggja að reglurnar þjóni tilgangi sínum.
Ráðherrann hefur jafnframt boðað frekari breytingar á útlendingalöggjöfinni í haust þegar heildarendurskoðun á dvalarleyfakerfinu verður lögð fyrir Alþingi.