Pétur Gunnlaugsson ræddi við Jón Pétur Zimsen, þingmann Sjálfstæðisflokksins og fyrrverandi skólastjóra í síðdegisútvarpinu um stöðu barna af erlendum uppruna í íslensku skólakerfi og þær breytingar sem hann telur nauðsynlegar til að bæta íslenskukunnáttu og aðlögun þeirra að samfélaginu. Jón Pétur sagði núverandi fyrirkomulag hafa skapað mikinn þrýsting á skóla og kennara og lagði til að komið yrði á sérstökum móttökuskólum eða móttökuúrræðum fyrir börn sem kæmu ný til landsins. Hlusta má á þáttinn í spilaranum hér að neðan.
Börnum oft hent óundirbúnum inn í skólakerfið
Í viðtalinu kom fram að stór hluti barna sem kæmu til Íslands hefðu hvorki íslensku né ensku að móðurmáli þegar þau hefðu nám í grunnskóla. Að mati Jóns Péturs væri óraunhæft að setja slík börn beint inn í almenna bekki án markvissrar tungumálakennslu og sérhæfðs stuðnings. Kennarar stæðu oft frammi fyrir mjög erfiðum aðstæðum þar sem nemendur í sama bekk væru með afar ólíkan tungumála- og námsgrunn. Í sumum tilvikum væru nokkrir nemendur í bekk sem skildu hvorki íslensku né ensku sem gerði kennslu og samskipti verulega flóknari.
Jón Pétur taldi að slíkt fyrirkomulag bitnaði bæði á þeim börnum sem kæmu ný til landsins og öðrum nemendum í bekknum. Börnin fengju ekki þann undirbúning sem þau þyrftu til að aðlagast íslensku skólastarfi og kennarar ættu erfitt með að sinna öllum nemendum nægilega vel.
Vill efla íslenskukennslu og aðlögun
Að mati Jóns Péturs væri skynsamlegra að byggja upp sérstök móttökuúrræði þar sem börn af erlendum uppruna fengju öfluga íslenskukennslu og stuðning frá sérfræðingum áður en þau færu að fullu inn í almenna bekki. Hann sagði slíkt fyrirkomulag myndi auðvelda félagslega og menningarlega aðlögun barnanna og auka líkur á að þau næðu árangri í námi síðar meir. Jón Pétur lagði áherslu á að markmiðið væri ekki að aðskilja börn heldur tryggja að þau fengju raunhæfan undirbúning til að geta tekið virkan þátt í íslensku skólastarfi.
Íslenskan í hættu
Í umræðunni kom einnig fram að víða hefðu skólar á höfuðborgarsvæðinu tekið miklum breytingum á skömmum tíma vegna fjölgunar barna af erlendum uppruna. Jón Pétur nefndi dæmi um skóla þar sem hlutfall nemenda með annað móðurmál en íslensku væri orðið mjög hátt og foreldrar hefðu áhyggjur af því að íslenskan tapaðist inni í skólastofunum.
Stjórnmálamenn hafa forðast umræðuna
Jón Pétur gagnrýndi jafnframt að stjórnmálamenn hefðu lengi forðast opna umræðu um áhrif hraðra breytinga í nemendahópum grunnskólanna. Hann sagði að Sjálfstæðisflokkurinn hefði verið einn fárra flokka sem hefðu lagt fram ítarlegar tillögur um breytingar í þessum málaflokki fyrir síðustu Alþingiskosningar. Hann lagði mikla áherslu á að menntakerfið yrði að laga sig að breyttum veruleika samfélagsins og nauðsynlegt væri að grípa til markvissra aðgerða til að tryggja bæði íslenskukunnáttu og gæði kennslu í grunnskólum landsins.
Hlusta má á ítarlegri umfjöllun í spilaranum hér að neðan.