Pétur Gunnlaugsson ræddi við Sólveigu Önnu Jónsdóttur, formann Eflingar í síðdegisútvarpinu um aukinn samruna Evrópusambandsins, lýðræði og fullveldi Íslands. Sólveig Anna sagði almenning eiga meiri möguleika á að hafa áhrif innan þjóðríkisins en gagnvart yfirþjóðlegum stofnunum. Hlusta má á þáttinn í spilaranum hér að neðan.
Lýðræðið sterkara innan þjóðríkisins
Aðspurð hvort hún teldi að ESB stefndi í átt að meiri samruna og sambandsríki sagði Sólveig að sú þróun væri þegar hafin. Hún vísaði til skrifa þýska félagsfræðingsins Wolfgangs Streeck og sagðist sammála því að almenningur ætti meiri möguleika á að afla sér valda innan þjóðríkisins.
Smæð Íslands gerði fólki kleift að hafa áhrif með þátttöku í stjórnmálum, stéttarfélögum og nærsamfélaginu. Þeir möguleikar myndu minnka ef ákvarðanir færðust til fjarlægari stofnana.
Takmörkuð áhrif við borðið
Pétur ræddi þau rök að Ísland fengi sæti við borðið og gæti haft áhrif á þróun ESB. Sólveig sagði málflutninginn mótsagnakenndan. Annars vegar væri lögð áhersla á að Ísland fengi 6 fulltrúa á Evrópuþinginu en hins vegar að þeir myndu dreifast á mismunandi þingflokka og ekki mynda sameiginlega fylkingu.
Hún sagðist skilja að fólk leitaði lausna vegna hárra vaxta og mikilla efnahagssveiflna. Íslendingar hefðu hins vegar lýðræðisleg verkfæri til að leysa þau vandamál innanlands.
Ólga og hernaðarvæðing
Aðspurð hvort ESB stefndi að því að verða stórveldi sagði Sólveig mikinn ágreining vera innan sambandsins um framtíðarstefnuna. Hún sagðist eiga von á aukinni pólitískri ólgu í Evrópu og taldi óvarlegt fyrir Ísland að ganga inn í sambandið meðan slík óvissa ríkti.
Sólveig gagnrýndi jafnframt aukna hernaðarvæðingu ESB og sagði sambandið leggja minni áherslu á diplómatískar lausnir. Hún gagnrýndi einnig viðbrögð þess við aðgerðum Ísraels gegn Palestínumönnum.
Treysti sér ekki til að meta auðlindamálin
Pétur spurði hvaða áhrif ESB-aðild gæti haft á rétt Íslendinga til arðs af auðlindum sínum. Sólveig sagðist ekki hafa næga sérþekkingu til að meta það en útilokaði ekki að samið yrði um óbreytta lögsögu og áframhaldandi yfirráð yfir fiskimiðunum.
Andstaða hennar byggðist fyrst og fremst á afleiðingum evrunnar og þeim breytingum sem hún taldi verða á íslenskum vinnumarkaði.
Hlusta má á ítarlegri umfjöllun í spilaranum hér að neðan.