Rúnar Þór ræddi við Gunnar Örn Hjördísarson, gítarsmið í þættinum Slappaðu af um styrktartónleika sem fram fara í Hafnarfirði til stuðnings Píeta samtökunum. Fram kom að margir af þekktustu blústónlistarmönnum landsins muni stíga á svið á heilsdagsviðburði í Ægi 220 við Strandgötu þar sem allur ágóði af miðasölu rennur óskiptur til samtakanna. Hlusta má á þáttinn í spilaranum hér að neðan.
Þrettán hljómsveitir á dagskrá
Tónleikarnir fara fram laugardaginn 27. júní og hefjast klukkan 15.00. Dagskráin stendur fram undir miðnætti og koma alls þrettán hljómsveitir og tónlistarhópar fram yfir daginn.
Meðal þeirra sem stíga á svið eru Fógetarnir, GG Blús, Blússveit Jonna Ólafs, Hráefni, MMC, Ungfrúin, Lame Dudes, CC Fleet, Bjössi Thor, Krummi, Gummi P og Ebenezer. Þá mun sérstakur hópur skipaður Begga Smára, Begga Morthens, Þorleifi Guðjóns, Einari Scheving og Gunnari Erni einnig flytja efni á hátíðinni.
Fram koma jafnframt margir af kunnustu blúsurum landsins, þar á meðal Guðmundur Pétursson, Krummi Björgvinsson, Björn Thoroddsen og Óskar Logi.
Allur ágóði til Píeta samtakanna
Sérstaða viðburðarins er sú að allt tónlistarfólkið gefur vinnu sína og rennur allur ágóði af miðasölu beint til Píeta samtakanna. Samtökin sinna mikilvægu forvarnar- og stuðningsstarfi fyrir fólk sem glímir við sjálfsvígshugsanir, sjálfsskaða og afleiðingar missis vegna sjálfsvíga.
Aðstandendur hátíðarinnar hvetja gesti einnig til að bæta við frjálsu styrktarframlagi við miðakaup til að auka enn frekar stuðning við starfsemi samtakanna.
Tónlist, bílar og fjölskylduvæn stemning
Viðburðurinn verður haldinn í Ægi 220 við Strandgötu 90 í Hafnarfirði. Húsið opnar klukkan 14.30 og geta gestir komið og farið af svæðinu að vild allan daginn.
Samhliða tónleikunum verður glæsileg bílasýning á vegum Krúsers og matavagnar verða á svæðinu. Markmiðið er að skapa lifandi menningarviðburð þar sem tónlist, samfélagsleg ábyrgð og samvera fara saman.
Miðaverð er 3.900 krónur og standa vonir til að góð þátttaka skili Píeta samtökunum mikilvægu framlagi til áframhaldandi starfsemi. Smelltu hér til þess að kaupa miða á Tix.
Hlusta má á ítarlegri umfjöllun í spilaranum hér að neðan.