Arnþrúður Karlsdóttir ræddi við Brynjar Níelsson, frambjóðanda í 3. sæti lista Sjálfstæðisflokksins í komandi borgarstjórnarkosningum, fyrrverandi þingmann og héraðsdómara, í síðdegisútvarpinu um samgöngumál í Reykjavík. Í umræðunni gagnrýndi Brynjar borgarlínuna, skipulag samgangna og þróun almenningssamgangna, auk þess sem rætt var um öryggi í strætisvögnum. Hlusta má á þáttinn í spilaranum hér að neðan.
Borgarlínan gengur gegn raunverulegum þörfum
Brynjar segir borgarlínuna byggja á skipulagsstefnu sem ekki taki mið af íslenskum aðstæðum. Hann bendir á að verkefnið sé umfangsmikið og kostnaðarsamt án skýrrar fjármögnunar og hafi víðtæk áhrif á uppbyggingu borgarinnar, þar á meðal þéttingu byggðar og forgangsröðun samgangna. Í máli Brynjars kom fram að samfélagið á höfuðborgarsvæðinu sé þannig uppbyggt að einkabíllinn sé fyrir marga nauðsynlegur, sérstaklega hjá fjölskyldum með börn. Hann telur að sú stefna að þrengja að bílaumferð til að knýja fram notkun almenningssamgangna samræmist ekki daglegum veruleika borgarbúa.
Skortur á uppbyggingu eykur tafir
Þá benti Brynjar á að samgöngumannvirki hafi ekki verið byggð upp í takt við þörf. Hann segir tafir í umferð hafa aukist vegna skorts á framkvæmdum og rangrar forgangsröðunar og telur að ráðast þurfi strax í aðgerðir sem bæta flæði umferðar og stytta ferðatíma.
Vill sveigjanlegra strætókerfi í stað stórra vagna
Brynjar telur stórar strætisvagnaeiningar ekki henta núverandi aðstæðum og bendir á að nýting þeirra sé lág. Hann leggur áherslu á að þróa sveigjanlegra kerfi með minni vögnum og tíðari ferðum sem taki mið af raunverulegri eftirspurn og bæti aðgengi farþega.
Öryggi tengt skipulagi og félagslegum vanda
Arnþrúður nefndi dæmi um ofbeldisatvik sem komið hafi upp í strætisvögnum og velti þeirri spurningu upp hvort hættan yrði jafnvel meiri i stærri vögnum sem fyrirhugaðar eru með borgarlínu. Brynjar segir slík mál endurspegla víðtækari félagslegan vanda en bendir jafnframt á að skipulag samgangna skipti máli fyrir öryggi. Hann telur að stærri vagnar og takmarkað eftirlit geti aukið áhættu og að horfa þurfi á heildarskipulag kerfisins í því samhengi.
Leggur áherslu á valfrelsi í samgöngum
Brynjar segir markmiðið að tryggja borgarbúum raunverulegt val um ferðamáta. Samgöngukerfið eigi að þjóna bæði ökumönnum, notendum almenningssamgangna, hjólreiðafólki og gangandi vegfarendum án þess að einn kostur sé settur ofar öðrum.
Hlusta má á ítarlegri umfjöllun í spilaranum hér að neðan.