Það er gríðarlega mikilvægt að farið sé mjög varlega að dæla efnum niður í berglög landsins eins og Carbfix áformar að gera í Hafnarfirði þegar ekki er vitað um hver áhrifin geta orðið því annars gæti farið illa. Þetta segir Kristinn Sigurjónsson rafmagns og efnaverkfræðingur en hann var gestur í þætti Arnþrúðar Karlsdóttur í dag.
Kristinn bendir á að hér á landi séu berglögin mjög ung í jarðfræðilegu tilliti og séu því gljúp og með mörgum sprungum. Í þessum sprungum sé oftar en ekki vatn og þegar koltvíoxíð sé blandað í vatn breytist það í kolsýru sem sé væg sýra. Hún geti þó haft áhrif á jarðveg og því þarf að fara að öllu með gát.
Iðnaðarkoltvíoxið inniheldur líka skaðleg efni
Hann bendir á að í Bandaríkjunum hafi menn verið að vinna metan upp úr jörðinni og hafi dælt ákveðnum efnum þar ofan í til þess að ná upp metaninu en efnin hafi svo valdið því að jarðvegurinn sé ónýtur á eftir. Kristinn segir að koltvíoxíð sé í sjálfu sér ekki slæmt efni en þarna sé um að ræða iðnaðarkoltvíoxíð sem innihaldi einnig önnur efni sem geti verið skaðleg umhverfinu og þau efni séu aðal vandamálið.
Niðurdæling á efninu breytist í Carbinat sem veldur stíflum í sprungum
Þá segir Kristinn að þegar verið sé að dæla koltvíoxíði ofan í berglögin þá breytist það með tímanum í efnið Carbinat sem sé efni sem sé ekki ósvipað kalki og það geti valdið stíflum í sprungum þar sem áður hefði vatn geta flætt óhindrað um. Þetta getur svo valdið því að þegar eigi að fara að nálgast grunnvatn,seinna meir, geti það orðið mjög erfitt þar sem bergið verður orðið mjög þétt.
Hlusta má á ítarlegri umræður í spilaranum hér að neðan