Pétur Gunnlaugsson ræddi við Einar Þorsteinsson, borgarfulltrúa Framsóknar, formann borgarráðs og fyrrverandi borgarstjóra í síðdegisútvarpinu um nokkur af umdeildustu málum Reykjavíkurborgar um þessar mundir. Þar bar hæst deilur um hjólhýsabyggðir, niðurstöður nýrrar skýrslu um Græna gímaldið og staðsetning Kaffistofu Samhjálpar við Grensásveg. Einar sagði nýjan meirihluta standa frammi fyrir flóknum málum sem krefðust bæði lagalegrar og stjórnsýslulegrar úrlausnar. Hlusta má á þáttinn í spilaranum hér að neðan.
Andstaða við varanlegar hjólhýsabyggðir
Einar sagði að Reykjavíkurborg ætti ekki að stefna að því að koma á fót varanlegum hjólhýsagörðum eða hjólhýsabyggðum sem húsnæðisúrræði fyrir borgarbúa. Hann benti á að slíkt samræmdist hvorki gildandi lögum né þeirri húsnæðisstefnu sem borgin ætti að fylgja. Í umræðunni rifjaði hann upp umdeilda ákvörðun fyrri meirihluta, um að gera samning vegna svæðis í Gufunesi fyrir fólk sem býr í hjólhýsum. Að hans mati hafi fyrir legið skýr andstaða íbúa, athugasemdir frá sérfræðingum og lagaleg álitaefni sem hefðu átt að leiða til annarrar niðurstöðu.
Hann lagði áherslu á að borgin bæri ábyrgð á að veita þeim sem væru í mestri húsnæðisþörf viðeigandi úrræði í gegnum félagslegt húsnæðiskerfi fremur en að þróa búsetuform sem ekki væru ætluð til varanlegrar búsetu.
Græna gímaldið rakið til mistaka í stjórnsýslu
Töluverð umræða fór fram um nýja skýrslu sem unnin var vegna deilna um Græna gímaldið. Einar sagði meginniðurstöðu hennar vera þá að um hefði verið að ræða stjórnsýslulega annmarka og veikleika í skipulags- og leyfisveitingarferli borgarinnar, fremur en pólitíska ákvörðun einstakra kjörinna fulltrúa. Samkvæmt skýrslunni hafi skort mikilvægar upplýsingar og gögn þegar ákvarðanir voru teknar. Kjörnir fulltrúar hafi því ekki haft fullnægjandi forsendur til að meta áhrif framkvæmdarinnar. Borgin hafi þegar hafið vinnu við að innleiða úrbætur sem ætlað sé að styrkja stjórnsýslu, skipulagsmál og leyfisveitingar þannig að sambærileg mál komi síður upp í framtíðinni.
Jafnframt hafi verið samþykkt að hefja viðræður við hagaðila á svæðinu um mögulegar aðgerðir til að draga úr neikvæðum áhrifum framkvæmdarinnar á nágranna og íbúa.
Kaffistofa Samhjálpar við Grensásveg vekur áhyggjur hjá íbúum
Pétur spurði Einar um þá ákvörðun, fyrri borgarstjórnar, að staðsetja Kaffistofu Samhjálpar við Grensásveg í rótgrónu íbúðahverfi þar sem skólar og leikskólar væru í næsta nágrenni og fjöldi íbúa hefði nú þegar mótmæt þessum áformum. Einar sagði þessa ákvörðun mjög gagnrýniverða og væri óásættanleg fyrir íbúa á svæðinu. Hann sagðist skilja mikilvægi þeirrar þjónustu sem Samhjálp veitir fólki í viðkvæmri stöðu en taldi að betur hefði þurft að huga að staðarvali. Íbúar á svæðinu hefðu ítrekað lýst yfir áhyggjum og mótmælt ákvörðuninni áður en leyfi voru veitt en fyrri borgarstjórn hefði ekki hlustað á þau mótmæli.
Að sögn Einars hefði nýr meirihluti reynt að koma í veg fyrir þessa niðurstöðu áður en hann tók við völdum. Nú þyrfti hins vegar að fara yfir stöðuna, fylgjast með framvindu málsins og bíða niðurstöðu kærumála sem þegar eru til meðferðar hjá stjórnvöldum.
Nýr meirihluti tekur við erfiðum deilumálum
Einar sagði að þessi mál sýndu öll, hversu mikilvægt væri að ákvarðanir sveitarfélagsins byggðu á skýrum gögnum, vandaðri stjórnsýslu og virku samráði við íbúa. Að hans mati hafi nokkur umdeild mál safnast upp á síðustu árum og nú væri það verkefni nýs meirihluta að vinna úr þeim af ábyrgð og reyna að finna lausnir sem standist bæði lög og kröfur borgarbúa um góða stjórnsýslu.
Hlusta má á ítarlegri umfjöllun í spilaranum hér að neðan.