Lokauppgjöri sérstaks húsnæðisstuðnings Reykjavíkurborgar fyrir árið 2025 er lokið. Greiðslur hafa verið endurreiknaðar samkvæmt staðfestum tekjuupplýsingum og getur niðurstaðan haft áhrif á rétt fólks til stuðningsins frá 1. september. Þeir sem fengu ofgreitt geta þurft að endurgreiða hluta stuðningsins en aðrir geta átt von á viðbótargreiðslu.
Við lokauppgjörið eru greiðslur sérstaks húsnæðisstuðnings endurreiknaðar út frá staðfestum tekjuupplýsingum frá Húsnæðis- og mannvirkjastofnun.
Réttur til stuðningsins ræðst meðal annars af tekjum, eignum, heimilisaðstæðum og húsnæðiskostnaði. Reykjavíkurborg ber upplýsingarnar fyrir árið 2025 saman við þær forsendur sem upphaflegar greiðslur byggðust á.
Ofgreiðsla getur lækkað mánaðarlegar greiðslur
Ef endurreikningurinn leiðir í ljós að einstaklingur fékk hærri greiðslur en hann átti rétt á þarf hann að endurgreiða mismuninn samkvæmt reglum Reykjavíkurborgar.
Fái viðkomandi áfram sérstakan húsnæðisstuðning er hægt að draga endurgreiðsluna frá mánaðarlegum greiðslum. Frádrátturinn má þó ekki vera hærri en 25% af mánaðarlegri greiðslu.
Einstaklingur sem á til dæmis rétt á 50.000 krónum á mánuði getur því að hámarki fengið 12.500 krónur dregnar frá mánaðarlegri greiðslu vegna eldri ofgreiðslu.
Sumir fá viðbótargreiðslu
Endurreikningurinn getur einnig leitt í ljós að fólk hafi fengið minna greitt en það átti rétt á.
Í þeim tilvikum mun velferðarsvið Reykjavíkurborgar greiða viðkomandi þann mismun sem upp á vantar.
Lokauppgjörið fer fram samkvæmt reglum Reykjavíkurborgar um sérstakan húsnæðisstuðning og getur ný niðurstaða haft áhrif á rétt til stuðningsins frá 1. september.