Aðildarumsókn Íslands að Evrópusambandinu, sem Jóhanna Sigurðardóttir forsætisráðherra og Össur Skarphéðinsson utanríkisráðherra undirrituðu 16. júlí 2009 sem möguleg ný umsókn yrði byggð á, inniheldur enga fyrirvara um sjávarútveg, landbúnað, matvælaöryggi eða aðra meginhagsmuni sem Alþingi hafði fjallað um. Þetta sést í umsókninni sem Útvarp Saga hefur undir höndum og sjá má neðst í fréttinni.
Umsóknin rúmast á einni síðu
Umsóknarbréfið er á ensku og aðeins ein síða. Það er stílað á Fredrik Reinfeldt og Carl Bildt fyrir hönd ráðs Evrópusambandsins og dagsett í Reykjavík 16. júlí 2009.
Í bréfinu segir að ríkisstjórn Íslands leggi fram umsókn lýðveldisins Íslands um aðild að Evrópusambandinu á grundvelli 49. gr. sáttmálans um Evrópusambandið. Þar er hvorki minnst á Alþingi né þjóðaratkvæðagreiðslu um væntanlegan aðildarsamning.
Engin skilyrði eða fyrirvarar eru settir fram í textanum. Þar er heldur ekkert fjallað um forræði Íslands yfir fiskveiðiauðlindinni, íslenskan landbúnað, fæðuöryggi, matvælaöryggi, dýraheilbrigði, orkuauðlindir eða almannaþjónustu.
Megináherslur Alþingis sjást ekki í bréfinu
Alþingi samþykkti aðildarumsóknina sama dag og bréfið var undirritað. Í þingsályktuninni var ríkisstjórninni falið að leggja inn umsókn og halda þjóðaratkvæðagreiðslu um væntanlegan aðildarsamning þegar viðræðum lyki.
Jafnframt var ríkisstjórninni gert að fylgja sjónarmiðum meiri hluta utanríkismálanefndar um verklag og meginhagsmuni við undirbúning og skipulag viðræðnanna.
Í nefndarálitinu var meðal annars lögð áhersla á forræði yfir sjávarauðlindinni, stjórn veiða og skiptingu aflaheimilda innan íslenskrar efnahagslögsögu. Þar var einnig fjallað um íslenskan landbúnað, fæðu- og matvælaöryggi, vernd búfjárstofna og áframhaldandi heimild til að takmarka innflutning lifandi dýra.
Ekkert þessara atriða birtist í umsóknarbréfinu sem sent var til Evrópusambandsins.
Umsóknin ekki í samræmi við vilja Alþingis
Jón Bjarnason, fyrrverandi sjávarútvegs- og landbúnaðarráðherra, sagði í samtali við Arnþrúði Karlsdóttur í Síðdegisútvarpinu í gær að fyrirvarar Alþingis hefðu ekki fylgt umsókninni. Bréfið hefði því formlega falið í sér umsókn um fulla og óskoraða aðild að Evrópusambandinu.
Skjalið staðfestir að engin skilyrði eða fyrirvarar voru settir fram í umsóknarbréfinu.
Jón sagði jafnframt að umsóknin hefði hvorki verið þýdd formlega á íslensku né birt í Stjórnartíðindum. Eintakið sem Útvarp Saga hefur undir höndum er eingöngu á ensku og við ítarlega leit í stjórnartíðindum er ekki að sjá að skjalið hafi nokkurn tíma verið birt þar.