Arnþrúður Karlsdóttir ræddi við Sigmund Davíð Gunnlaugsson, formann Miðflokksins og fyrrverandi forsætisráðherra í síðdegisútvarpinu um stækkunaráform Evrópusambandsins og aukinn áhuga á Íslandi og Grænlandi. Sigmundur Davíð segir ESB stefna að inntöku nýrra og fátækari ríkja sem þurfi mikla styrki. Einhver þurfi að koma með peninga á móti og sambandið líti til ríks lands eins og Íslands sem geti hjálpað til við að „borga brúsann“. Hlusta má á þáttinn í spilaranum hér að neðan.
Stækkun ESB og aukinn áhugi á norðurslóðum
Arnþrúður vakti athygli á stækkunaráformum Evrópusambandsins og auknum áhuga þess á Grænlandi. Hún vísaði til fyrirhugaðrar ferðar Ursulu von der Leyen, forseta framkvæmdastjórnar ESB og Mette Frederiksen, forsætisráðherra, Danmerkur til Grænlands og þess að Grænlendingum hefði verið boðinn mikill fjárstuðningur fyrir aukin tengsl við sambandið.
Arnþrúður spurði Sigmund Davíð hvernig hann meti þessa þróun. Sigmundur Davíð sagði Evrópusambandið komið í tilvistarkreppu eftir ítrekuð áföll. Evrópuríki drægjust aftur úr Bandaríkjunum, Kína og öðrum ríkjum í framleiðslu, hagvexti og lífskjörum. Jafnframt væru velferðar- og eftirlaunakerfi margra aðildarríkja í erfiðri stöðu.
Fátækari ríki þurfa mikla styrki
Sigmundur Davíð sagði stefnt að inngöngu nýrra og mjög fátækra ríkja í Evrópusambandið. Þau þyrftu mikla styrki frá sambandinu og því þyrfti einhver að leggja fram fjármuni á móti.
Þar kæmi Ísland inn í myndina. Sigmundur Davíð sagði sambandið líta til ríks lands eins og Íslands sem gæti hjálpað til við að „borga brúsann“.
Flest ríkin sem biðu eftir aðild væru tiltölulega fátæk og hann sagði það skýra að hluta áhuga Evrópusambandsins á Íslandi og Grænlandi.
Meira vald og sameiginlegar skuldir ESB ríkja
Sigmundur Davíð tengdi stækkunaráformin við þróun innan Evrópusambandsins og vísaði meðal annars til skýrslu Mario Draghi um stöðu Evrópu.
Hann sagði Draghi hafa dregið upp dökka mynd af stöðu Evrópusambandsins en þær lausnir sem lagðar væru til fælu í sér aukna samþjöppun og meira vald til ESB. Þar nefndi hann aukið vald yfir fjármálum aðildarríkjanna, sameiginlegar skuldir, allt að 800 milljarða evra fjármögnun, skattlagningarvald og aukin afskipti af fjárlögum og hermálum. Sigmundur Davíð sagði þessa auknu samþjöppun valds valda mikilli óánægju víða í Evrópu.
Ekki sama Evrópusamband og árið 2009
Arnþrúður vísaði til fyrirhugaðs fundar von der Leyen, með forsætisráðherrum Grænlands og Danmerkur og sameiginlegrar yfirlýsingar ESB og Grænlands um aukna samvinnu á sviði varnar og öryggismála. Hún spurði hvort þetta væri sama Evrópusamband og Ísland sótti um aðild að árið 2009.
Sigmundur Davíð svaraði því neitandi og sagði sambandið hafa þróast stöðugt. Kerfið stækkaði og fengi meira vald og þegar illa gengi væri svarið gjarnan aukin völd og fleiri reglugerðir.
Hann rifjaði upp upplýsingar frá Bændasamtökunum um að regluverk ESB hefði vaxið um 53% frá því Ísland sótti um aðild. Kerfið yrði þannig stöðugt stærra og þyngra í vöfum.
Sigmundur Davíð sagði ESB jafnframt sækjast eftir landfræðilegri stækkun. Grænland væri stór landmassi á norðurslóðum og sambandinu gæti þótt freistandi að nota Donald Trump sem eins konar grýlu gagnvart Grænlendingum og ESB væri að bjóða Grænlendingum mikla fjármuni.
Hlusta má á ítarlegri umfjöllun í spilaranum hér að neðan.