Ný gögn úr samantektinni Ferðaþjónusta í tölum – sumar 2024 sýna að um 770 þúsund ferðamenn fóru frá Íslandi um Keflavíkurflugvöll í sumar. Þetta er 2,4% fækkun frá síðasta ári, eða um 19 þúsund færri ferðamenn en sumarið 2023. Samt sem áður er þetta fjórða fjölmennasta ferðamannasumarið frá því að mælingar hófust.
Bandaríkjamenn fjölmennastir
Bandaríkjamenn voru fjölmennasti hópur ferðamanna með 265 þúsund brottfarir, eða rúmlega þriðjungur heildarfjölda ferðamanna. Þjóðverjar komu næstir með 56 þúsund brottfarir, en það er 8,2% færri en árið áður. Ítalskir ferðamenn voru þriðji fjölmennasti hópurinn, um 36 þúsund talsins, sem er mesti fjöldi Ítala á Íslandi yfir sumarmánuðina til þessa.
Fækkun í gistinóttum á hótelum
Gistinætur á hótelum í sumar voru um 1,7 milljónir, sem er um 1,8% færra en árið 2023. Um 80% af þessum gistinóttum voru nýttar af erlendum ferðamönnum. Þegar litið er til allra skráðra gististaða var fjöldi gistinátta í sumar um fjórar milljónir, eða 0,8% fækkun frá metárinu 2023. Þetta er þó 2,3% aukning frá sumrinu 2022.
Herbergjanýting mest í ágúst
Á landsvísu var herbergjanýting á hótelum hæst í ágúst, eða um 86%. Suðurland og höfuðborgarsvæðið voru með hæstu nýtinguna, en í þessum landshlutum náði nýtingin allt að 90% í ágúst. Aðrir landshlutar voru með nýtingu á bilinu 72–82% yfir sumarið.
Gistinætur Íslendinga haldast stöðugar
Gistinætur Íslendinga voru um 979 þúsund, líkt og síðustu ár, þar sem landsmenn nýta sér enn gistingu innanlands í auknum mæli frá COVID-19 faraldrinum.