Traust þeirra aðila sem selja ferðir til Íslands hefur aldrei mælst hærra og eru afar jákvæðar fréttir fyrir ferðaþjónustuna á óvissutímum. Þetta segir í tilkynningu frá Íslandsstofu sem greinir frá niðurstöðum úr svokallaðari meðmælamælingu.
Erlendir ferðasöluaðilar frá Þýskalandi eru bjartsýnni en söluaðilar frá öðrum markaðssvæðum gagnvart ferðalögum viðskiptavina sinna til Íslands í kjölfar COVID-19, en helmingur þeirra gerir ráð fyrir ferðalögum strax í sumar. Söluaðilar frá Norðurlöndunum, Bretlandseyjum auk Suður- og Mið-Evrópu gera jafnframt ráð fyrir talsverðum ferðalögum í sumar, og að bókanir verði komnar í svo til eðlilegt horf næsta vor.
Söluaðilar frá Norður-Ameríku og fjarmörkuðum telja að bókanir og ferðalög nái aftur á móti ekki eðlilegu horfi fyrr en í byrjun næsta árs.
Sigríður Dögg Guðmundsdóttir, fagstjóri ferðaþjónustu hjá Íslandsstofu segir að það komi forsvarsmönnum Íslandsstofu ekki á óvart að nærmarkaðir hafi tekið fyrr við sér en búist hafði verið við í fyrstu
„Það kemur okkur ekki á óvart að nærmarkaðir virðast ætla að taka fyrr við sér enda er það í takt við áherslur okkar í markaðsverkefninu Saman í sókn. Við fylgjumst að sjálfsögðu vel með þróuninni á okkar helstu markaðssvæðum og lögum aðgerðir okkar að breytingum sem kunna að verða þar á.“