Héraðsdómur Reykjavíkur hefur úrskurðað fimm karla í áframhaldandi 10 daga gæsluvarðhald vegna rannsóknar á umfangsmiklu fíkniefnamáli. Gæsluvarðhaldið gildir til föstudagsins 19. júní. Mennirnir, tveir íslenskir ríkisborgarar og þrír erlendir, voru handteknir í aðgerðum Lögreglunnar á höfuðborgarsvæðinu í Reykjavík og Hveragerði.
Fíkniefnin flutt með Norrænu
Málið snýr að innflutningi á kókaíni og amfetamíni sem flutt var til landsins með farþega- og flutningaskipinu Norrænu. Gæsluvarðhaldið var framlengt á grundvelli rannsóknarhagsmuna að kröfu Lögreglunnar á höfuðborgarsvæðinu.
Rannsókninni miðar vel
Samkvæmt lögreglu miðar rannsókn málsins vel. Rannsóknin hefur verið unnin í samstarfi nokkurra lögregluembætta ásamt Tollgæslunni, sem hefur komið að rannsókn málsins frá upphafi. Ekki hafa verið veittar frekari upplýsingar um umfang innflutningsins eða magn þeirra fíkniefna sem lagt var hald á.