Byggingaframkvæmdum við nýjan meðferðarkjarna Landspítala við Hringbraut er ætlað að ljúka að mestu í árslok 2029. Uppbygging Landspítala stendur yfir til ársins 2031 og nær einnig til framkvæmda við Grensás, Sjúkrahúsið á Akureyri og bráðamóttökuna í Fossvogi. Þetta kemur fram í tilkynningu frá Heilbrigðisráðuneytinu.
Stjórn Nýs Landspítala ohf. og stýrihópur um framkvæmdir við Landspítala og önnur sérhæfð sjúkrahús hafa kynnt heilbrigðisráðherra og fjármála- og efnahagsráðherra uppfærða heildaráætlun verkefnisins.
Ytri vinnu við meðferðarkjarnann lokið
Mikil uppbygging hefur átt sér stað við Hringbraut og er allri ytri vinnu við nýja meðferðarkjarnann lokið. Innanhússframkvæmdir hafa staðið yfir á annað ár, meðal annars í kjöllurum og á legudeildum á tveimur efstu hæðum byggingarinnar.
Gert er ráð fyrir að byggingaframkvæmdum ljúki að mestu í árslok 2029. Samhliða verklokum hefst yfirfærslutímabil þar sem undirbúið verður að hefja starfsemi í húsinu með nýjum tækjum og búnaði. Skipulagning flutninga er þegar hafin í samstarfi við erlenda sérfræðinga.
Innanhússfrágangi og uppsetningu tækjabúnaðar í nýju rannsóknahúsi á að ljúka á undan meðferðarkjarnanum.
Framkvæmdir standa til ársins 2031
Hringbrautarverkefnið nær auk meðferðarkjarnans og rannsóknahússins til bílastæða- og tæknihúss, bílakjallara og ýmissa stofnkerfa. Þar undir falla einnig framkvæmdir við götur, jarðveg og veitur auk sjúkrahótelsins sem tekið var í notkun árið 2019.
Heildarfjárfestingin vegna uppbyggingar Landspítala dreifist yfir langt tímabil. Framkvæmdatíminn er miðaður við árin 2010 til 2031 og samkvæmt heildaráætluninni er uppbyggingin fullfjármögnuð í gildandi fjármálaáætlun Alþingis.
Nýbyggingar við Grensás og á Akureyri
Nýr Landspítali vinnur jafnframt að sérhæfðum sjúkrahúsbyggingum utan Hringbrautar. Nýbyggingu fyrir endurhæfingarþjónustu Landspítala við Grensás á að ljúka í upphafi árs 2027.
Á Akureyri er fyrirhuguð nýbygging fyrir legu-, dag- og göngudeildir Sjúkrahússins á Akureyri og er áætlað að henni ljúki árið 2031.
Þá hefur verið unnið að stækkun matsdeildar bráðamóttökunnar í Fossvogi. Samkvæmt áætluninni á þeim framkvæmdum að ljúka fyrir haustið 2026.