Arnþrúður Karlsdóttir ræddi við Vigdísi Hauksdóttur, lögfræðing, fyrrverandi þingmann og borgarfulltrúa í Fréttum vikunnar um hugsanlega aðild Íslands að Evrópusambandinu. Vigdís sagði umræðuna hafa tekið á sig aðra mynd en hún hefði búist við. Hún taldi málflutning utanríkisráðherra hafa breyst frá því ferlið hófst og sagði jafnframt að sífellt meira bæri á persónuárásum gegn þeim sem vildu hafna áframhaldandi viðræðum. Samtökin Áfram Ísland hafi markað þáttaskil í umræðunni og koma Ólafs Ragnars Grímssonar fyrrverandi forseta, skipti verulegu máli. Hlusta má á þáttinn í spilaranum hér að neðan.
Persónuárásir áberandi
Aðspurð um þróun umræðunnar segir Vigdís sér þykja athyglisvert hversu mikil óþolinmæði sé gagnvart þeim sem hyggist segja nei gegn áframhaldandi viðræðum við Evrópusambandið. Hún segir að í stað þess að svara rökum þeirra sé ráðist að persónum og reynt að gera þær ótrúverðugar með neikvæðum ummælum.
Vigdís bendir á að samtökin Heimssýn hafi lagt áherslu á að fjalla um málefni fremur en einstaklinga. Að hennar mati sé það merki um veikan málstað þegar umræðan færist yfir í persónur í stað efnislegra sjónarmiða.
Segir fleiri upplifa þessa meðferð í fyrsta sinn
Arnþrúður bendir á að Vigdís hafi sjálf áður orðið fyrir harðri gagnrýni í stjórnmálum. Vigdís tekur undir það og segir að hún hafi kynnst slíkri framgöngu bæði sem þingmaður og borgarfulltrúi. Nú sé staðan þó önnur þar sem margir sem hafi ekki áður tekið virkan þátt í stjórnmálaumræðu stígi fram til að tjá afstöðu sína til fullveldis Íslands og lendi í þessari reynslu í fyrsta sinn.
Fram kom að þetta hafi fælingarmátt gagnvart fólki sem annars myndi taka þátt í opinberri umræðu og segja skoðun sína.
Áfram Ísland hefur styrkt umræðuna
Vigdís talaði um fund hreyfingarinnar Áfram Ísland og sagði að þar hafi orðið ákveðin þáttaskil. Vigdís segir ánægjulegt að nýr félagsskapur hafi bæst við í umræðuna og bendir á að yfir þúsund manns hafi sótt fund hreyfingarinnar auk þess sem fundinum hafi verið streymt á netinu og fjöldi manns hafi hlustað.
Hún segir þann stuðning sýna að sífellt fleiri vilji taka þátt í umræðunni um framtíð Íslands gagnvart Evrópusambandinu. Að hennar mati sé það mikilvægt þar sem fjölbreytt sjónarmið þurfi að komast að áður en þjóðin gangi til atkvæðagreiðslu.
Hlusta má á ítarlegri umfjöllun í spilaranum hér að neðan.