Samgöngu- og sveitarstjórnarráðuneytinu bauð til fundar á dögunum þar sem farið var yfir sameiginlega stefnumótun fyrir fjarskipti, póstmál, netöryggismál og málefni Þjóðskrár Íslands sem nú er undirbúningi í samgöngu- og sveitarstjórnarráðuneytinu.
Af því tilefni bauð ráðuneytið til fundarins þar sem saman komu helstu hagsmunaaðilar, framkvæmdaaðilar og samstarfsaðilar ráðuneytisins í þeim málaflokkum sem hin nýja stefna mun ná til.
„Með metnaði, skýrri stefnu og skipulegri eftirfylgni geta Íslendingar tryggt farsæla tæknilega umbreytingu samfélagsins á þann hátt að landsmenn allir njóti afrakstursins,“ sagði Sigurður Ingi Jóhannsson samgöngu- og sveitarstjórnarráðherra í ávarpi sínu á fundinum. Tæknileg umbreyting samfélagsins væri sannarlega hafin og Ísland væri til að mynda í þeirri eftirsóknarverðu stöðu að vera með besta fjarskiptakerfi í heimi að mati Alþjóðafjarskiptasambandsins.
Í ávarpi ráðherra kom meðal annars fram að nú í upphafi kjörtímabilsins séu stefnumótunarverkefni í forgangi og í lok ársins muni liggja fyrir nýjar stefnur í öllum helstu málaflokkum sem undir samgöngu- og sveitarstjórnarráðuneytið heyra. Fram kom að í sumar yrði lögð fram til umsagnar, í samráðsgátt ráðuneytanna, drög að svokallaðri grænbók um fjarskipti, netöryggi, póstmál og málefni Þjóðskrár Íslands. Í henni verða drög að stöðumati, framtíðarsýn og helstu áherslum á viðkomandi sviðum.
Á fundinum, sem haldinn var á Hótel Sögu, var farið yfir stöðumat málaflokkanna fjögurra, sjónarmið stofnana og hagsmunaaðila voru kynnt og gestir á vinnustofunni tóku þátt í hópavinnu. Nú verður unnið úr þeim tillögum sem fram komu á fundinum og lögð lokahönd á grænbókina áður en hún fer í opið samráð. Stefnt er að því að ljúka stefnumótunarvinnunni og leggja þingsályktun um nýja stefnu í málaflokkunum fyrir Alþingi á haustþingi 2018.
