Útvarp Saga sagði frá bónarbréfi 30 þingmanna demókrata fyrr í vikunni sem báðu Joe Biden Bandaríkjaforseta að reyna að stuðla að friði í Úkraínu. Undir bréfið rituðu þekktir þingmenn demókrata úr róttækari arminum eins og t.d. Pramila Jayapal formaður róttækra demókrata og Alexandria Ocasio-Cortez.
Friðardúfan send af stað með friðarbréf róttækra demókrata til Hvíta hússins – hún átti ekki afturkvæmt
Í bréfinu skrifuðu þingmennirnir:
„Í ljósi þeirrar eyðileggingar sem þetta stríð hefur skapað fyrir Úkraínu og heiminn, sem og hættuna á hörmulegri stigmögnun, teljum við einnig að það sé í þágu Úkraínu, Bandaríkjanna og heimsins að forðast langvarandi átök.“
Engin gagnrýni kom fram á herstuðning Bandaríkjanna fram að þessu og í ljósi komandi kosninga héldu sumir að um kosningabrellu væri að ræða, til að hafa áhrif á kjósendur sem vilja frið í stað kjarnorkustríðs í heiminum. En enginn friður var í Hvíta húsinu fyrir friðardúfu flokkssystkina forsetans og varð ófriðurinn svo mikill að friðardúfan komst ekki lifandi frá verkefninu. Að friðardúfa sást á flugi í hvítri söluskrifstofu vopnaframleiðenda setti stríðshauka og vopnabraskara í þvílíkt uppnám að rætt var um að róttæki armur demókrata hefði gengið í lið repúblikana til að tryggja þeim sigur í komandi kosningum. Við því varð hæsta stjórn demókrataflokksins að bregðast og eftir fund með óróaseggjum flokksins sem dirfuðst að skrifa friðabón til forsetans var gefin út yfirlýsing sem allir gátu sætt sig við. Pramilla Jayapal formaður róttækra demókratískra þingmanna sendi þá frá sér nýja yfirlýsingu:
„Demókratahópur þingsins dregur hér með til baka nýlegt bréf sitt til Hvíta hússins varðandi Úkraínu“
„Bréfið var samið fyrir nokkrum mánuðum síðan en var því miður sent af starfsmanni í leyfisleysi. Sem formaður þingflokksins tek ég ábyrgð á þessu. Vegna tímasetningar er boðskap okkar af sumum ruglað saman við nýlega yfirlýsingu leiðtoga repúblikana, McCarthy, þar sem hann hótar að stöðva aðstoð til Úkraínu ef repúblikanar fái völdin. Tímaröð þessara yfirlýsinga skapaði þá óheppilegu mynd, að demókratar sem eindregið og einróma hafa stutt og greitt atkvæði með öllum hernaðarpökkum og stefnumótandi og efnahagslegri aðstoð við úkraínsku þjóðina, séu á einhvern hátt í takt við repúblikana, sem reyna að koma í veg fyrir stuðning Bandaríkjanna við Zelensky forseta og úkraínska herinn.“
„Ekkert gæti verið fjær sannleikanum. Sérhvert stríð endar með samningum og þetta stríð líka eftir sigur Úkraínu. Þó að bréfið sem sent var í gær endurtaki þá grundvallarreglu, þá hefur því verið ruglað saman við andstöðu repúblikana við að styðja réttláta vörn Úkraínumanna fyrir fullveldi þeirra. Þess vegna truflar bréfið á þessum tíma og við drögum bréfið til baka.“
