Arnþrúður Karlsdóttir ræddi við Ólaf Guðmundsson, umferðarsérfræðing í Síðdegisútvarpinu um Strætó, fargjöld, þjónustugæði og nýjar samgöngulausnir. Í viðtalinu sagði Ólafur að almenningssamgöngur á höfuðborgarsvæðinu væru langt á eftir því sem þekktist í nágrannalöndum Íslands og bæði verðlag, tíðni ferða og skipulag kerfisins drægi úr notkun þess. Hlusta má á þáttinn í spilaranum hér að neðan.
Há fargjöld og löng tíðni milli ferða fælir fólk frá Strætó
Ólafur sagði að eitt stærsta vandamál Strætó væri hversu langt liði milli ferða. Að hans mati þyrfti tíðni á helstu leiðum að vera 7 til 10 mínútur svo kerfið gæti raunverulega keppt við einkabílinn. Hann gagnrýndi einnig verðlagið og sagði stakt fargjald upp á 690 krónur of hátt. Fram og til baka ferð gæti þannig kostað um 1400 krónur, sem gerði það að verkum að í mörgum tilvikum væri ódýrara að nota einkabíl.
Ólafur sagði að í Danmörku væri kerfið einfaldara og hraðvirkara. Þar gengju farþegar inn um allar dyr vagna og skráðu sig inn og út með síma eða greiðslukorti. Kerfið safnaði jafnframt upplýsingum um ferðamynstur og nýtingu leiða sem nýttar væru til að bæta þjónustu og fjölga ferðum þar sem þörf væri mest.
Vill fleiri minni vagna og sjálfkeyrandi lausnir
Í viðtalinu sagði Ólafur að framtíð almenningssamgangna lægi ekki endilega í mjög stórum liðvögnum heldur minni og tíðari vögnum. Hann sagði að borgir á borð við Helsinki, London og París væru þegar byrjaðar að prófa sjálfkeyrandi rafvagna sem þjónustuðu íbúðahverfi og tengdu fólk við stærri stofnleiðir. Ólafur sagði að slíkir vagnar hefðu verið kynntir við Hörpu árið 2018 og að tillögur um tilraunaverkefni í Reykjavík hefðu verið felldar niður. Hann taldi að minni sjálfkeyrandi vagnar, deilibílar og sjálfkeyrandi leigubílar gætu orðið mikilvægur hluti af samgöngukerfi framtíðarinnar hér á landi.
Hann sagði jafnframt að stórir liðvagnar gætu reynst óhagkvæmir þar sem þeir væru oft hálftómir utan annatíma.
Árásir og afbrot í Strætó
Arnþrúður nefndi í viðtalinu að árásum og afbrotum í Strætó hefði fjölgað og benti á að með stærri vögnum gæti glæpum í strætó fjölgað enn frekar. Ólafur sagði að mjög stórir vagnar gætu skapað aðstæður þar sem auðveldara væri fyrir hópa að valda usla eða fremja afbrot, sérstaklega ef eftirlit væri lítið. Hann sagði að í Danmörku og fleiri löndum væru sérstakir eftirlitsmenn á ferðinni í vögnum sem sinntu bæði miðaskoðun og öryggiseftirliti. Að hans mati væri slíkt fyrirkomulag raunhæfara en að treysta eingöngu á bílstjóra í stórum vögnum. Hann ítrekaði að hann væri fylgjandi minni vögnum þar sem hættan á slíkum atburðum væri minni.
Ólafur sagði að tæknin og lausnirnar væru þegar til staðar erlendis og að hægt væri að innleiða margar þeirra hér á landi án þess að fara í jafn kostnaðarsamar framkvæmdir og tengjast Borgarlínu.
Hlusta má á ítarlegri umfjöllun í spilaranum hér að neðan.