Hjördís Vilhjálmsdóttir ræddi við Hilmar Þór Björnsson, arkitekt og Þórhall Bjarna Björnsson, nema í skipulagsfræðum í Svíþjóð og stofnanda Facebook-síðunnar Arkitektauppreisnin á Íslandi – Byggjum fallegt aftur – í þætti sínum um framtíð byggingarlistar. Hilmar sagði gervigreindina geta stuðlað að fjölbreyttari og fallegri byggingum með því að gera almenningi kleift að sýna skýrar hvers konar hús hann vildi. Löggiltir hönnuðir þyrftu eftir sem áður að útfæra hugmyndirnar og bera ábyrgð á teikningunum. Hlusta má á þáttinn í spilaranum hér að neðan.
Fólk geti kallað eftir öðrum húsum
Hjördís spurði hvernig Hilmar sæi framtíð byggingarlistar fyrir sér og hvort komandi kynslóðir myndu sætta sig við þann einsleita byggingarstíl sem væri áberandi í nýjum hverfum.
Hilmar svaraði að þróunin væri komin of langt. Byggingar væru orðnar þunglamalegar og drungalegar en gervigreindin gæti að hans sögn bjargað byggingarlistinni.
Fólk gæti lært að nota tæknina til að setja fram hugmyndir að húsum sem því þættu falleg og hentuðu þörfum þess. Með því móti gæti almenningur komið með skýrari óskir til þeirra sem sæju um endanlega hönnun og framkvæmd.
Fagmenn bæru áfram ábyrgðina
Hilmar sagði gervigreindina ekki leysa af hólmi þá faglegu ábyrgð sem fylgdi húsbyggingum. Eftir að hugmynd hefði orðið til þyrfti að koma henni til aðila sem hefði tilskilin réttindi, ynni fullnaðar-teikningar og bæri ábyrgð á þeim.
Hann rifjaði upp verkefni sem stofan hans vann fyrir um 20 árum þegar óskað var eftir hönnun húss í Texas. Stofan hefði ekki haft réttindi til að leggja fram teikningar þar. Því hefði hún unnið hugmyndina og skýringargögn en fyrirtæki með réttindi á staðnum gengið frá formlegum teikningum og tekið ábyrgð á þeim.
Hilmar sagði svipað fyrirkomulag geta skapast með gervigreind. Tæknin gæti mótað fyrstu hugmyndirnar en fagfólk þyrfti að yfirfara þær, tryggja að þær uppfylltu reglur og breyta þeim í framkvæmanlegar byggingarteikningar.
Gæti fækkað verkefnum arkitekta
Breytingin gæti haft veruleg áhrif á störf arkitekta. Hilmar sagði gervigreindina geta komið að hönnun húsa og jafnvel garða. Einstaklingar gætu lýst óskum sínum um útlit, liti, glugga, þak og klæðningu og fengið tillögur sem endurspegluðu eigin smekk.
Hann taldi þetta geta aukið áhrif almennings á byggingarlist og rofið þá einsleitni sem hefði einkennt mikla uppbyggingu. Tæknin gæti þannig orðið til þess að eftirspurn eftir fjölbreyttari húsum yrði sýnilegri.
Hilmar bætti þó við að þróunin hefði aðra hlið. Ef gervigreind tæki að sér stærri hluta hugmyndavinnunnar gætu hefðbundin verkefni arkitekta orðið færri. Tæknin gæti því að hans sögn bjargað byggingarlistinni en um leið dregið úr vinnu arkitekta.
Hlusta má á ítarlegri umfjöllun í spilaranum hér að neðan.