Magnús Ólafsson frá Sveinsstöðum fer með fyrsta hópinn sinn í sérstaka söguferð um söguslóðir Grettissögu þann 1. maí næstkomandi. Á tveimur dögum verður farið um Húnaþing og Skagafjörð þar sem þátttakendur heimsækja marga af þekktustu stöðum sögunnar á meðan Magnús rekur atburði úr ævi Grettis Ásmundarsonar. Magnús hefur undanfarin ár staðið fyrir vinsælum söguferðum víða um land þar sem hann sameinar frásagnalist og ferðalög um sögufræga staði. Upphafið má rekja til ársins 2018 þegar hann fór ríðandi með hópa um slóðir síðustu aftökunnar á Íslandi. Aðsóknin varð mikil og síðar fór hann að taka á móti hópum sem komu akandi í Húnaþing til að fræðast um söguna.
Árið 2024 gaf Magnús út bókina Öxin Agnes og Friðrik sem fjallar um síðustu aftökuna á Íslandi. Hann segir bókina hafa fengið góðar viðtökur og sölu gengið vel.
Hugmyndin fæddist á námskeiði hjá HÍ
Magnús segir hugmyndina að Grettisferðinni hafa kviknað eftir námskeið hjá Endurmenntun Háskóla Íslands um Grettissögu í vetur.
„Þegar ég komst að því að ekki ætti að fara neina söguferð eftir þetta námskeið datt mér í hug að bjóða upp á slíka ferð fyrir samnemendurna,“ segir hann.
Hann byggði ferðina upp á reynslu sinni af öðrum söguferðum sem hann hefur farið með undanfarin sumur eftir að hafa lokið námi í Ferðamálaskóla Íslands árið 2021.
Farið um helstu staði Grettissögu
Meðal þeirra staða sem heimsóttir verða eru Bjarg í Miðfirði þar sem Grettir fæddist og ólst upp, Spjótsmýri í Hrútafirði, Þóreyjarnúpur í Vesturhópi og Þórhallastaðir í Forsæludal þar sem bardagi Grettis við Glám átti sér stað. Í Skagafirði verður meðal annars komið við á Reykjum á Reykjaströnd, við Grettislaug, Hegranesþingi og Viðvík. Þá hyggst Magnús einnig fara með hópinn út í Haganesvík þar sem saga Þorbjörns Önguls tengist lokakafla ævi Grettis.
Magnús segir að Þórhallastaðir hafi sérstaka merkingu fyrir sig persónulega enda séu þeir nærri heimabæ hans. „Það urðu mikil þáttaskil í lífi Grettis í bardaganum við Glám,“ segir hann.
Sér sterka tengingu milli Grettis og Fjalla-Eyvindar
Á heimleiðinni verður stoppað í Eyvindarstofu þar sem Magnús segir ferðafólki einnig frá Fjalla-Eyvindi. Hann segir sterka sameiginlega þræði liggja milli Fjalla-Eyvindar og Grettis sem báðir lifðu langa útlegð og voru hundeltir árum saman.
„Fjalla-Eyvindur lifði útlegðina en það hefði Grettir líka gert ef galdrakerling hefði ekki átt stóran þátt í að vinna hann með galdrabruggi,“ segir Magnús.
Mikill áhugi á söguferðum
Magnús segir viðtökur við söguferðunum almennt hafa verið mjög góðar og að sumir þátttakendur komi ár eftir ár. Hann telur jafnframt að áhugi fólks á íslenskum sögum og menningararfi sé mikill.
„Margir vilja vita sem mest um lífið fyrrum. Ritun Íslendingasagnanna er í raun merkur menningararfur,“ segir hann.
Enn eru laus sæti í ferðina en þátttakendur greiða aðeins fyrir mat, gistingu og hlutdeild í rútukostnaði. Magnús segir því um afar hagkvæma ferð að ræða.
Rétt er að benda áhugasömum á að hægt er að senda póst á netfangið [email protected] fyrir nánari upplýsingar, einnig er hægt að hringja í Magnús í síma 898-5695.
Hér að neðan má sjá í flettimyndaröð sannkallaða myndaveislu af slóðum Grettis og Fjalla Eyvindar.
