Pétur Gunnlaugsson ræðddi við Vilhjálm Birgisson formann Verkalýðsfélags Akranes i síðdegisútvarpinu í dag vegna frétta af hryðjuverkaaktívistanum Paul Watson sem hefði nú sent skip sitt Bandero inn í íslenska efnahagslögsögu í þeim tilgangi að stöðva Kristján Loftsson við hvalveiðar sem nú fara fram í Hvalfirði.
Vilhjálmur gagnrýndi komu slíkra aðila til landsins og sagði óásættanlegt að þeir reyndu að stöðva lögmætar hvalveiðar. Hann vísaði sérstaklega til þess að einn þeirra sem nú væri um borð í skipi á vegum Paul Watson hefði sökkt tveimur hvalveiðiskipum Hvals hf í Reykjavík árið 1986. Hlusta má á þáttinn í spilaranum hér að neðan.
Hann sagði íslensk stjórnvöld eiga að handtaka viðkomandi og leiða hann fyrir dóm vegna þeirra brota sem framin voru á sínum tíma. Að hans sögn beindust skemmdarverkin að atvinnufrelsi fyrirtækis og starfsfólki sem starfaði við hvalveiðar og óeðlilegt væri að einstaklingar sem tengdust slíkum verknaði fengju að koma óáreittir til landsins. Bandero skipið væri á siglingu á vesturlandi og væri enn innan Efnahagslögsögunnar sem væri alþjóðlegt hafsvæði en ef hann færi inn fyrir 12 sjómílur í fiskveiðilögsöguna ættu yfirvöld að láta til skarar skríða gegn áhöfninni.
Lagagrundvöllur veiðanna skýr
Vilhjálmur hafnaði því að hvalveiðar væru ólöglegar og sagði þær byggjast á gildandi íslenskum lögum, reglugerðum og veiðiráðgjöf Hafrannsóknastofnunar. Hann vísaði jafnframt til álits umboðsmanns Alþingis vegna ákvörðunar Svandísar Svavarsdóttur um að stöðva hvalveiðar árið 2023 og sagði niðurstöðu umboðsmanns staðfesta að ráðuneytið hefði ekki fylgt lögbundinni málsmeðferð og í raun brotið lög.
Hann sagðist jafnframt undrast að hryðjuverkaaktivistar héldu því ítrekað fram að hvalveiðar væru ólöglegar en hefðu ekki látið reyna á þær fullyrðingar fyrir dómstólum. Það sýndi að lagagrundvöllur veiðanna væri skýr.
Varar við áhrifum ESB-aðildar á hvalveiðar
Vilhjálmur sagði afstöðu Evrópusambandsins til hvalveiða gefa skýra vísbendingu um hvaða áhrif aðild Íslands gæti haft á greinina. Hann rifjaði upp að Evrópusambandið hefði lýst andstöðu við hvalveiðar og sagðist óttast að Ísland myndi smám saman missa sjálfstætt ákvörðunarvald yfir nýtingu hvalastofna ef landið gengi í Evrópusambandið.
Hann sagði Íslendinga sjálfa eiga að ákveða hvernig auðlindir landsins væru nýttar á grundvelli íslenskra laga og vísindalegrar ráðgjafar, án afskipta erlendra ríkja eða alþjóðlegra samtaka.
Hlusta má á ítarlegri umfjöllun í spilaranum hér að neðan