Arnþrúður Karlsdóttir ræddi við Vigdísi Hauksdóttur, fyrrverandi borgarfulltrúa Miðflokksins,og lögfræðing í síðdegisútvarpinu um nýjan meirihluta í Reykjavík. Sagði Vigdís að útilokanir flokka úr meirihlutasamstarfi vera vaxandi útilokunarmenningu í stjórnmálum. Vigdís sagði útilokanir Miðflokksins úr meirihlutaviðræðum minna á hegðun sem þekkt væri úr grunnskólum og taldi slíka framkomu vera orðna fastan hluta af stjórnmálaumræðu bæði hér á landi og víðar í Evrópu. Vigdís sagði að mikill fjöldi fólks væri nú að skrá sig í Miðflokkinn eftir að flokknum var haldið fyrir utan stjórnaraðild borgarinnar. Hlusta má á þáttinn í spilaranum hér að neðan.
Meirihlutinn endurspeglar ekki niðurstöður kosninganna
Í viðtalinu sagði Vigdís að þróunin eftir borgarstjórnarkosningarnar væri ekki í takt við vilja kjósenda í Reykjavík. Hún taldi eðlilegra að Sjálfstæðisflokkurinn og Miðflokkurinn hefðu myndað 2ja flokka meirihluta þar sem flokkarnir hefðu saman náð meirihluta borgarfulltrúa. Arnþrúður rifjaði upp að Björg Magnúsdóttir í Viðreisn hefði, fyrir kosningar útilokað samstarf við Miðflokkinn. Vigdís sagði þá orðræðu hafa verið mjög áberandi í kosningabaráttunni og taldi hana bera keim af pólitískri útilokun fremur en málefnalegum ágreiningi. Þá hafi Einar Þorsteinsson Framsóknarflokki útilokað samstarf með Samfylkingunni fyrir kosningar.
Hún benti jafnframt á að áður hefði Sjálfstæðisflokkurinn verið sagður „óstjórntækur“ í borginni og nú væri sambærileg orðræða notuð um Miðflokkinn. Að hennar mati væri þar verið að skapa stjórnmálaumhverfi þar sem ákveðnir flokkar væru skilgreindir fyrirfram utan samstarfs.
Slík framkoma hvorki heilbrigð né lýðræðisleg
Arnþrúður spurði hvort um væri að ræða nýja tegund stjórnmála þar sem flokkar gætu fyrirfram útilokað aðra flokka frá samstarfi óháð niðurstöðu kosninga. Vigdís sagði slíka framkomu hvorki eðlilega né heilbrigða fyrir lýðræðissamfélag. Hún líkti stöðunni við einelti í leik- og grunnskólum og sagði ákveðna hópa í stjórnmálum haga sér eins og hrekkjusvín sem héldu sömu einstaklingunum stöðugt utan hópsins. Að hennar mati hefði þessi menning færst úr skólakerfinu yfir í stjórnmálin.
Í umræðunni nefndi Vigdís einnig að undanfarin ár hefðu komið upp eineltismál innan stjórnkerfis Reykjavíkurborgar þar sem starfsfólk hefði orðið fyrir miklu álagi á meðan þeir sem bæru ábyrgð sætu áfram við völd.
Gagnrýnir fjölmiðla og vók-stjórnmál
Vigdís gagnrýndi einnig þá þróun að fjölmiðlamenn spyrðu stjórnmálaflokka fyrir kosningar hvaða flokka þeir hygðust útiloka frá samstarfi. Hún sagði slíkar spurningar ýta undir sundrungu í stað þess að beina umræðunni að stefnumálum og stjórnun. Arnþrúður vakti athygli á þróun stjórnmála í Evrópu og nefndi meðal annars Alternative für Deutschland í Þýskalandi og Reform UK í Bretlandi. Hún sagði sambærilega útilokunarmenningu hafa þróast þar sem ákveðnir flokkar væru sagðir ósamstarfshæfir áður en eiginlegar viðræður hæfust.
Vigdís sagði að Vók-hugmyndafræðin hefði haft mikil áhrif á umræðuna og tjáningarfrelsi væri í auknum mæli aðeins viðurkennt fyrir ákveðna hópa. Hún taldi slíkar aðferðir geta haft þveröfug áhrif og styrkt þá flokka sem reynt væri að halda utan við valdastöður.
Þá nefndi Vigdís að Miðflokkurinn hefði samkvæmt upplýsingum frá flokknum fengið mikinn fjölda nýrra skráninga eftir að ljóst varð að flokkurinn yrði ekki hluti af nýjum meirihluta í Reykjavík.
Hlusta má á ítarlegri umfjöllun í spilaranum hér að neðan.