Arnþrúður Karlsdóttir ræddi við Guðlaug Þór Þórðarson, þingmann Sjálfstæðisflokksins og fyrrverandi utanríkisráðherra í síðdegisútvarpinu í dag, um hvað fælist í því að samþykkja framhald aðildarviðræðna við Evrópusambandið. Guðlaugur sagði mikilvægt að gera sér grein fyrir að Ísland væri ekki aðeins að fara í viðræður til að kanna hvaða samningur fengist heldur væri verið að sækja um fulla aðild að ESB. Hlusta má á þáttinn í spilaranum hér að neðan.
„Við erum að sækja um fulla aðild“
Arnþrúður spurði út í þá framsetningu að verið væri að kjósa um að halda áfram aðildarviðræðum og hvort þar með væri verið að taka upp þráðinn frá fyrra aðildarferli frá umsókninni árið 2009 frá ríkisstjórn Jóhönnu Sigurðardóttur.
Guðlaugur sagði að kjarninn væri skýr. Um væri að ræða aðildarumsókn og Ísland væri að sækja um fulla aðild að Evrópusambandinu. Hann sagði því rangt að nálgast málið eins og aðeins væri verið að kanna hvað ESB hefði að bjóða áður en ákvörðun yrði tekin síðar.
Aðildarferlið fæli í sér að Ísland þyrfti að laga sig að reglum sambandsins. Guðlaugur líkti því við að sækja um lán hjá banka. Hægt væri að semja um ákveðin atriði en starfsmaður bankans gæti ekki breytt grunnreglum bankans eða útlánaskilyrðum fyrir einn viðskiptavin.
Fyrri umsóknin liggur til grundvallar
Guðlaugur sagði að ekki væri verið að hefja alveg nýtt ferli frá grunni heldur væri fyrri aðildarumsókn Íslands enn grundvöllurinn. Það væri því verið að taka aftur upp ferli sem hófst með umsókn um fulla aðild að Evrópusambandinu af ríkisstjórnar Jóhönnu Sigurðardóttur.
Arnþrúður spurði hvort þetta þýddi að fyrri samningar og skuldbindingar tengdar aðlögunarferlinu tækju gildi á ný.
Hann svaraði því til að samningur um aðlögunarstyrki væri enn til staðar og að hann yrði virkur á ný ef þjóðin samþykkti framhald ferlisins.
Milljarðar fóru í aðlögunarstyrki
Guðlaugur sagði 8 til 10 milljarða króna hafa farið í aðlögunarstyrki í fyrra ferlinu. Þeir hefðu meðal annars verið notaðir til að undirbúa íslenskt stjórnkerfi fyrir aðild og aðlaga það að regluverki ESB.
Hann nefndi sem dæmi kröfu um breytingar á tollakerfinu sem hefði kallað á milljarða kostnað og verulega fjölgun starfsmanna.
Þetta sýndi að hans sögn hvers vegna ekki væri rétt að lýsa ferlinu sem einfaldri könnun á því hvaða kjör Ísland gæti fengið. Þegar ferlið færi af stað hæfist jafnframt vinna við að undirbúa íslenskt stjórnkerfi fyrir fulla aðild.
Hlusta má á ítarlegri umfjöllun í spilaranum hér að neðan.