Gunnar Þórðarson tónskáld, lagahöfundur, gítarleikari og upptökustjóri er látinn, 81 árs að aldri. Hann var einn áhrifamesti tónlistarmaður Íslands og átti stóran þátt í mótun íslenskrar dægurtónlistar í meira en sex áratugi. Eftir hann liggja hundruð laga sem mörg hafa skipað sér meðal þekktustu og ástsælustu laga þjóðarinnar.
Frumkvöðull íslenskrar popptónlistar
Gunnar fæddist á Hólmavík 4. janúar 1945 en ólst að mestu upp í Keflavík. Hann vakti fyrst athygli með Hljómum á sjöunda áratugnum og samdi meðal annars lögin Fyrsti kossinn og Bláu augun þín. Síðar var hann einn af burðarásum Trúbrots, Ðe Lónlí Blú Bojs, Þú og ég, Ríó tríós og Sléttuúlfanna.
Einn af afkastamestu lagahöfundum landsins
Á ferli sínum samdi Gunnar yfir 700 lög, auk þess að starfa sem útsetjari, upptökustjóri og hljómsveitarstjóri. Hann kom að ótal hljómplötum og samdi einnig tónlist fyrir kvikmyndir, sjónvarp, leikhús og sinfónísk verk. Þá stjórnaði hann hljómsveit Íslands í fyrstu þátttöku landsins í Eurovision árið 1986.
Skildi eftir sig varanleg spor
Lög Gunnars hafa verið flutt af fjölmörgum af fremstu söngvurum landsins og eru enn órjúfanlegur hluti af íslenskri tónlistarsögu. Verk hans spanna allt frá bítlatónlist og rokki til dægurlaga, barnalaga, kvikmyndatónlistar og klassískra tónverka.
Hér að neðan má hlýða á eitt af hans þekktustu lögum.