Arnþrúður Karlsdóttir ræddi við Ólaf Guðmundsson umferðarsérfræðing í síðdegisútvarpinu um hvaða aðgerðir væri hægt að ráðast í strax til að draga úr umferðartöfum á höfuðborgarsvæðinu. Í viðtalinu sagði Ólafur að umræðan fyrir sveitarstjórnarkosningarnar hefði of mikið snúist um Borgarlínu, Fossvogsbrú og stór jarðgangaverkefni sem tæki mörg ár að undirbúa og framkvæma. Að hans mati væri hins vegar hægt að ná fram verulegum breytingum á örfáum mánuðum með hagkvæmari lausnum. Hlusta má á þáttinn í spilaranum hér að neðan.
Snjallljós auka afkastagetu gatna
Ólafur sagði stærstu stofnæðar borgarinnar vera nýttar langt undir fullri afkastagetu vegna úreltra ljósastýringa. Hann sagði að umferðarljós á höfuðborgarsvæðinu væru enn að mestu stýrt með föstum klukkukerfum sem tækju ekki mið af raunverulegri umferð. Í staðinn taldi hann að taka ætti upp snjallstýrð ljósakerfi með myndavélum, radar- og skynjarabúnaði ásamt gervigreind sem gæti greint umferð í rauntíma og stýrt flæði eftir álagi hverju sinni. Að sögn Ólafs eru slík kerfi þegar í notkun í Noregi, Danmörku og fleiri löndum.
Hann sagði fyrstu snjallljósin hafa verið sett upp við Höfðabakka og í Árbæ, en að þau væru enn ekki komin í fulla notkun. Hann taldi að hægt væri að skipta út 30 til 50 lykilgatnamótum á höfuðborgarsvæðinu á nokkrum mánuðum fyrir um 1,5 til 2,5 milljarða króna.
Vill fjarlægja ljósastýrðar gangbrautir og setja göngubrýr í stað þeirra
Ólafur lagði einnig áherslu á að fjarlægja ljósastýrðar gangbrautir af stærstu stofnbrautunum og byggja í staðinn göngubrýr eða undirgöng. Hann nefndi Miklubraut, Kringlumýrarbraut, Sæbraut og Suðurlandsbraut sem dæmi um götur þar sem gangbrautarljós stöðvuðu stóran umferðarstraum reglulega og skertu afkastagetu gatnakerfisins. Hann sagði hægt að reisa staðlaðar stálgöngubrýr með litlum tilkostnaði og á skömmum tíma, líkt og gert hefði verið yfir Reykjanesbraut og við Arnarnesveg. Kostnaður við hverja brú gæti verið á bilinu 150 til 270 milljónir króna ef farið væri í einfaldar lausnir án kostnaðarsamra sérútfærslna.
Segir veðráttu ekki útiloka lausnina
Arnþrúður spurði hvort íslensk veðrátta gæti skapað vandamál fyrir slíkar göngubrýr. Ólafur sagði reynsluna sýna annað og nefndi að núverandi göngubrýr á höfuðborgarsvæðinu hefðu staðið sig vel í snjó, hálku og vindi ef rétt væri staðið að hönnun, frárennsli og skjólveggjum. Hann sagði einnig að þar sem þröngt væri um pláss mætti nota undirgöng í stað brúa. Ólafur sagði að þessar framkvæmdir mætti ráðast í án langra skipulags- og umhverfismatsferla og að þær gætu skilað sýnilegum árangri innan eins kjörtímabils.
Hlusta má á ítarlegri umfjöllun í spilaranum hér að neðan.