Hætta ætti við Borgarlínu og fyrirhugaða vegtolla

Hjördís Vilhjálmsdóttir ræddi við Ara Edwald, borgarfulltrúa Miðflokksins í Reykjavík, og Mörtu Guðjónsdóttur, fyrrum borgarfulltrúa Sjálfstæðisflokksins, í þættinum Skipulagsmál, á Útvarpi Sögu í dag, um Borgarlínu, fjármögnun samgöngusáttmálans og fyrirhugaða vegtolla. Marta vill hætta við Borgarlínu en Ari telur nauðsynlegt að draga verulega úr umfangi verkefnisins. Þau gagnrýndu miklar kostnaðarhækkanir og áform um nýja skattheimtu af bílaumferð. Hlusta má á þáttinn í spilaranum hér að neðan.

Fjármögnun Borgarlínu sögð ótrygg

Ari gagnrýndi að ráðist hefði verið í undirbúning Borgarlínu án þess að endanleg fjármögnun lægi fyrir. Betri samgöngur söfnuðu skuldum á meðan Alþingi hefði hvorki samþykkt nauðsynlegar fjárveitingar né ákveðið hvernig standa ætti undir kostnaðinum.

Hann sagði hægt að bæta almenningssamgöngur með aukinni ferðatíðni, áreiðanlegra leiðakerfi og hagkvæmari framkvæmdum í stað þeirrar umfangsmiklu uppbyggingar sem fyrirhuguð væri.

Vegtollar gætu kostað ökumenn 210.000 krónur á ári

Ari sagði áformin gera ráð fyrir 14–15 milljörðum króna í árlegar skatttekjur af bílaumferð frá 2030. Hann nefndi 500 króna gjald fyrir hverja ferð um Ártúnsbrekku sem dæmi. Einstaklingur sem færi þar um til og frá vinnu í 210 daga á ári greiddi samkvæmt því 210.000 krónur árlega.

Hann benti á að oddvitar Reykjavíkur, Kópavogs og Hafnarfjarðar hefðu lagst gegn gjaldtöku á eldri stofnvegum. Sveitarfélögin gætu jafnframt beitt skipulagsvaldi sínu til að koma í veg fyrir slíka skattheimtu.

Kostnaður sagður hafa hækkað í 311 milljarða

Marta sagði heildarkostnað samgöngusáttmálans hafa hækkað úr 120 milljörðum í 311 milljarða króna við endurskoðun hans árið 2024. Framkvæmdatíminn hefði jafnframt lengst um 7 ár.

Hún gagnrýndi að mislæg gatnamót við Bústaðaveg og Reykjanesbraut hefðu frestast til 2030 og snjallljósastýringar hefðu ekki fengið nægilegan forgang.

Marta nefndi einnig Fossvogsbrúna sem upphaflega hefði átt að kosta 2,3 milljarða króna en væri nú komin yfir 10 milljarða án þess að framkvæmdum væri lokið.

Hjördís spurði hvað hver ferð með Borgarlínu myndi kosta ef stofnkostnaður væri reiknaður inn í miðaverðið.

Marta sagði réttast að hætta við Borgarlínu og fyrirhugaða vegtolla. Ari vildi hins vegar endurskoða áformin og leggja meiri áherslu á hagkvæmari lausnir í almenningssamgöngum.

Hlusta má á ítarlegri umfjöllun í spilaranum hér að neðan.

Deila þessari frétt á samfélagsmiðla

Deila