Uppbygging vindorkuvera og möguleg tenging Íslands við orkumarkað Bretlands með sæstreng hafa valdið áhyggjum af því hvernig staðið yrði að nýtingu orkunnar. Spurt var hvort slíkar framkvæmdir muni nýtast íslenskum almenningi og atvinnulífi eða leiða til hærra orkuverðs og minni aðgengis að raforku innanlands. Þetta kom fram í viðtali Arnþrúðar Karlsdóttur við Höllu Hrund Logadóttur þingmann Framsóknarflokksins og fyrrverandi Orkumálastjóra. Hlusta má á ítarlegar umræður um orkumálin í spilaranum hér.
Fjöldi erlendra aðila að undirbúa vindorkuver
Halla Hrund vakti athygli á að yfir 40 vindorkuverkefni væru í undirbúningi víða um land og að flest þeirra væru á vegum erlendra einkaaðila helst frá Frakklandi og Danmörku. Hún sagði að skortur væri á heildstæðri og skýrri löggjöf um eignarhald, arðsemi og samfélagsleg áhrif vindorkunnar. Ef ekki væri skýrt hverjir nytu ávinningsins gæti orkan runnið úr landi án þess að hagsmunir þjóðarinnar væru tryggðir.
Tengingar við erlend orkukerfi geta haft víðtæk áhrif
Í þættinum var einnig fjallað um mögulegan orkusæstreng milli Íslands og Bretlands. Halla Hrund benti á að slík tenging myndi gera orkuna aðgengilega erlendum kaupendum sem gætu boðið hærra verð en íslensk heimili og fyrirtæki. Þannig gæti dregið úr forgangi innlendra notenda og leitt til hækkunar orkuverðs innanlands.
Skýr stefna nauðsynleg áður en lengra er haldið
Halla Hrund lagði áherslu á að áður en slík verkefni væru samþykkt þyrfti að liggja fyrir skýr stefna um nýtingu, verðmyndun og samfélagslegan ábata. Hún sagði mikilvægt að móta leikreglur sem tryggðu jafnræði, sanngjarnt orkuverð og arðsemi til þjóðarinnar. Án þess væri hætta á að ákvarðanir sem teknar eru í dag hefðu neikvæð áhrif til framtíðar.
Hlusta má á ítarlegri umfjöllun í spilaranum hér að neðan.