Arnþrúður Karlsdóttir og Pétur Gunnlaugsson ræddu við Hauk Hauksson fréttamann í Moskvu, í Heimsmálunum um vaxandi ágreining innan Evrópu um áframhaldandi stuðning við Úkraínu. Fram kom að nýjar pólitískar vendingar í nokkrum ríkjum hefðu veikt samstöðu innan Evrópusambandsins og skapað óvissu um fjárveitingar og stefnu gagnvart Rússlandi. Hlusta má á þáttinn í spilaranum hér að neðan.
Leiðtogar í Austur-Evrópu hafna frekari stuðningi
Í þættinum var bent á að Viktor Orbán, fráfarandi forsætisráðherra Ungverjalands hefði staðið gegn frekari lánveitingum og fjárstuðningi við Úkraínu innan Evrópusambandsins. Sama afstaða hafi komið fram fram hjá Péter Magyar, arftaka Orbán en Péter hefur lýst yfir andstöðu við að opinbert fjármagn fari til stjórnvalda í Kænugarði. Einnig var Robert Fico nefndur í þessu samhengi en hann hefur áður gagnrýnt stuðning Vesturlanda við Úkraínu. Samkvæmt því sem fram kom í viðtalinu eru þessir leiðtogar sammála um að leggja meiri áherslu á samskipti við Rússland frekar en áframhaldandi fjárhagslegan og hernaðarlegan stuðning.
Kosningaúrslit í Búlgaríu breyta stöðunni
Haukur Hauksson sagði að niðurstöður nýlegra kosninga í Búlgaríu hefðu komið á óvart. Þar hafi fyrrverandi forseti landsins farið með sigur af hólmi og stefni að myndun ríkisstjórnar sem vilji efla samskipti við Rússland og draga úr stuðningi við Úkraínu. Þessi niðurstaða bætist við þróun í Ungverjalandi og Slóvakíu þar sem stjórnvöld hafa einnig sett fyrirvara við stefnu Evrópusambandsins. Þetta skapar nýtt pólitískt jafnvægi innan sambandsins þar sem fleiri ríki setja spurningarmerki við áframhaldandi aðgerðir.
Áhrif á stefnu Brussel og innri togstreita
Í viðtalinu var bent á að þessi þróun setji þrýsting á ákvarðanatöku í Brussel. Fram kom að væntingar hefðu verið um samstöðu meðal aðildarríkja en raunveruleikinn væri orðinn annar. Haukur sagði að ágreiningur milli ríkja Vestur- og Austur-Evrópu hefði aukist og það gæti haft áhrif á bæði fjárveitingar og hernaðaraðstoð. Þá var einnig vísað til umræðu um að almenningur í sumum ríkjum væri síður tilbúinn að styðja frekari aðgerðir.
Stuðningur við Úkraínu takmarkaður
Samkvæmt því sem fram kom er óljóst hvernig Evrópusambandið muni bregðast við þessum breytingum. Á meðan sum ríki halda áfram að styðja Úkraínu af krafti eru önnur farin að draga úr stuðningi eða setja skilyrði. Þessi klofningur er talinn hafa bein áhrif á stöðu Úkraínu þar sem fjárhagslegur og hernaðarlegur stuðningur frá Evrópu hefur verið lykilþáttur í átökunum frá upphafi.
Hlusta má á ítarlegri umfjöllun í spilaranum hér að neðan.