Arnþrúður Karlsdóttir ræddi við Guðmund Franklín Jónsson, í Heimsmálunum á Útvarpi Sögu í dag, um áhrif niðurstöðu þjóðaratkvæðagreiðslunnar á stjórnmálin í Evrópu. Guðmundur sagði nei-sigurinn gefa hreyfingum sem berjast gegn aukinni miðstýringu Evrópusambandsins, byr undir báða vængi og nefndi sérstaklega þróunina í Frakklandi og Þýskalandi. Hlusta má á þáttinn í spilaranum hér að neðan.
Marine Le Pen þakkaði Íslendingum
Arnþrúður vakti athygli á því að Marine Le Pen hefði brugðist hratt við niðurstöðunni og þakkað Íslendingum. Hún sagði Ísland hafa sýnt fram á að önnur Evrópa væri möguleg þar sem ríki gætu átt heilbrigð viðskipti og samstarf án þess að afsala sér fullveldi.
Viðbrögðin sýndu jafnframt hversu fljótt íslenska þjóðaratkvæðagreiðslan varð hluti af pólitískri umræðu utan landssteinanna. Guðmundur sagði niðurstöðuna geta haft veruleg áhrif í Frakklandi þar sem átök um framtíð Evrópusambandsins og vald Brussel hafa lengi verið áberandi.
AfD sækir fram í Þýskalandi
Guðmundur beindi einnig sjónum að Þýskalandi og uppgangi AfD undir forystu Alice Weidel. Hann sagði flokkinn sækja hratt í sig veðrið og tengdi þá þróun við vaxandi óánægju með stefnu Evrópusambandsins.
Þar gæti niðurstaðan á Íslandi orðið mikilvægt innlegg í umræðuna. Íslendingar hefðu hafnað áframhaldandi aðildarviðræðum þrátt fyrir mikinn þrýsting í aðdraganda kosninganna og það gæti hvatt sambærilegar hreyfingar annars staðar í Evrópu.
Guðmundur sagði breytingarnar þegar orðnar greinilegar bæði í Frakklandi og Þýskalandi og að íslenska niðurstaðan félli inn í þá þróun sem ætti sér stað bæði í Þýskalandi og Frakklandi.
Áhrifin ná langt út fyrir Ísland
Þá benti Guðmundur á að stærstu afleiðingar þjóðaratkvæðagreiðslunnar gætu jafnvel komið fram utan Íslands. Niðurstaðan hefði sýnt öðrum þjóðum að hægt væri að hafna frekari samþættingu við Evrópusambandið og halda jafnframt áfram nánu samstarfi og viðskiptum við Evrópuríki.
Hann taldi því að þótt atkvæðagreiðslan hefði snúist um íslenska aðildarumsókn í nafni ” að kíkja í pakkann” gæti pólitískt vægi hennar orðið mun víðtækara. Fullveldishreyfingar í öðrum ríkjum hefðu nú fengið íslenskt fordæmi sem þær gætu vísað til í eigin baráttu gegn auknu valdi Brussel.
Hlusta má á ítarlegri umfjöllun í spilaranum hér að neðan.