Arnþrúður Karlsdóttir og Guðmundur Franklín Jónsson fjölluðu í Heimsmálunum um sólmyrkvann sem Guðmundur upplifði á Hellissandi. Hann lýsti deginum sem stórkostlegum og sagði upplifunina hafa verið slíka að hann væri þegar farinn að hugsa um að ferðast erlendis til að sjá annan sólmyrkva. Hlusta má á þáttinn í spilaranum hér að neðan.
Skýin opnuðust á réttu augnabliki
Guðmundur hafði farið vestur á Snæfellsnes til að fylgjast með myrkvanum og endaði á Hellissandi þar sem mikill fjöldi fólks hafði safnast saman. Veðrið leit þó ekki vel út um tíma. Það rigndi og ský huldu sólina þannig að óvíst var hvort fólk fengi að sjá það sem það hafði komið til að upplifa.
Rétt þegar mestu skipti rofaði hins vegar til. Sólin birtist og Guðmundur náði að fylgjast með myrkvanum og taka bæði myndir og myndskeið. Upplifunin stóð undir væntingum og gott betur.
Tilbúinn að ferðast til að upplifa þetta aftur
Eftir þessa reynslu sagðist Guðmundur hiklaust geta hugsað sér að leggja á sig ferðalag til að upplifa annan sólmyrkva og nefndi Guðmundur í því sambandi að hann gæti hugsað sér að ferðast til Marokkó eða Egyptalands.
Mikil athygli erlendis
Arnþrúður og Guðmundur ræddu jafnframt hversu mikla athygli sólmyrkvinn vakti utan Íslands. Arnþrúður sagði umfangsmikla umfjöllun hafa birst í erlendum fjölmiðlum, meðal annars í Bandaríkjunum, í Bretlandi, Frakklandi, Þýskalandi og á Norðurlöndum. Fallegar myndir frá Íslandi hefðu birst víða og mikið verið lagt í fréttaumfjöllun um viðburðinn.
Þau ræddu einnig hversu sjaldgæfir slíkir viðburðir væru og hvernig myrkvinn hefði vakið áhuga fólks á stjörnuhimninum og sólkerfinu.
Hlusta má á ítarlegri umfjöllun í spilaranum hér að neðan.
Myndband sem Guðmundur tók af sólmyrkvanum má sjá hér að neðan.