Alþjóðlega glerlistarhátíðin Glóandi Jökull – Glowing Glacier Glass Festival verður sett á Hellissandi 24. júní og stendur til 19. júlí. Á hátíðinni mun Hellissandur umbreytast í lifandi miðstöð glerlistar þar sem boðið verður upp á sýningar, glerblástur, vinnustofur, fyrirlestra og fjölbreytta viðburði fyrir almenning.
Hátíðin er samstarfsverkefni skipuleggjenda frá Íslandi, Írlandi, Sviss og Þýskalandi. Bjarni Sigurbjörnsson er sýningarstjóri verkefnisins en meðal helstu skipuleggjenda eru Alison Lowry frá Írlandi, Jonas Noel Niedermann frá Sviss og Nadja Recknagel frá Þýskalandi. Verkefnið er unnið í samstarfi við Handverk og hönnun ásamt fjölmörgum innlendum og erlendum listamönnum og fagfólki á sviði glerlistar.
Glerlist frá tíu löndum á samsýningu
Meginviðburður hátíðarinnar er samsýningin Glowing Glacier sem verður í Gamla leikfimissalnum á Hellissandi. Þar verða verk eftir tíu glerlistamenn frá Íslandi, Kanada, Írlandi, Sviss, Danmörku, Þýskalandi og Tékklandi.
Sýningin gefur innsýn í fjölbreytileika samtímaglerlistar þar sem ólíkar aðferðir, hugmyndafræði og efnismeðferð mætast í verkum listafólks frá mismunandi menningarsvæðum.
Einkasýningar víðs vegar um þorpið
Samhliða samsýningunni verða þrjár einkasýningar á Hellissandi.
Í Þjóðgarðsmiðstöðinni sýnir írski listamaðurinn Fiona Byrne verkið Returning the Skin. Danski listamaðurinn Laura Sonne Lund verður með sýninguna Echoes í Félagsmiðstöðinni Afdrepi og þýski listamaðurinn Louise Lang sýnir Fractures of Shadow í 3 Veggjum/Himinbjörgum.
Með þessu dreifast viðburðir hátíðarinnar um byggðarkjarnann og skapa sérstaka menningarupplifun fyrir gesti sem geta gengið á milli sýningastaða.
Gestir geta fylgst með lifandi glerblæstri
Eitt af því sem einkennir hátíðina er að almenningur fær tækifæri til að fylgjast með vinnu listamanna í rauntíma.
Í Vöruhúsinu á Hellissandi verður starfræktur færanlegur glerofn þar sem gestir geta séð hvernig glóandi gler er mótað í listaverk. Þar munu meðal annars listamennirnir Carissa Baktay, Anders Vange og Jan Vyskocil vinna með heitt gler fyrir opnum tjöldum.
Jafnframt verður boðið upp á vinnustofur þar sem þátttakendur geta sjálfir kynnst vinnslu glers og prófað handbragðið undir leiðsögn fagfólks.
Sagan og framtíð glerlistar rædd
Fyrirlestrar og kvöldviðburðir verða haldnir í Bjarkey Bókakaffi þar sem fjallað verður um glerlist frá ýmsum sjónarhornum.
Meðal annars mun Sigrún Einarsdóttir flytja erindi um sögu glerlistar á Íslandi undir yfirskriftinni Gler í Bergvík – upphaf glerlistar á Íslandi. Einnig verða samtöl við þátttakandi listamenn og kynningar á verkefnum þeirra.
Mikilvægt framlag til íslensks handverks
Aðstandendur hátíðarinnar leggja áherslu á að Glóandi Jökull sé ekki aðeins listahátíð heldur einnig vettvangur fyrir þróun og eflingu sérhæfðs handverks á Íslandi.
Glerlist krefst mikillar efnisþekkingar og sérhæfðrar verkkunnáttu, en innviðir greinarinnar hér á landi eru takmarkaðir. Með alþjóðlegri hátíð sem þessari skapast tækifæri til faglegra tengsla, þekkingarmiðlunar og aukins sýnileika fyrir íslenska glerlist.
Hátíðin hefur hlotið stuðning meðal annars frá Nordic Culture Point, Sóknaráætlun Vesturlands, Culture Ireland, Culture Moves Europe, Handverki og hönnun og fjölda annarra innlendra og erlendra samstarfsaðila.
Með Glóandi Jökli verður Hellissandur í sumar samkomustaður listafólks, handverksfólks og gesta víðs vegar að úr heiminum og vettvangur þar sem glóandi gler, listsköpun og alþjóðlegt samstarf mætast undir Snæfellsjökli.