Arnþrúður Karlsdóttir ræddi við Hildi Björnsdóttur, oddvita Sjálfstæðisflokksins í Reykjavík í síðdegisútvarpinu um leikskólamál og stöðu barnafjölskyldna í borginni. Hildur sagði langa biðlista, fækkun dagforeldra og sífellt dýrara leikskólakerfi hafa skapað mikla spennu hjá foreldrum ungra barna. Hún sagði Sjálfstæðisflokkinn vilja fjölga valkostum í daggæslu og leikskólum í stað þess að allir séu neyddir inn í sama kerfið. Hlusta má á þáttinn í spilaranum hér að neðan.
Barnafjölskyldur flýja Reykjavík
Hildur sagði tölur frá Hagstofunni sýna að þrátt fyrir fólksfjölgun í Reykjavík hafi fjöldi barna staðið nær í stað. Að hennar mati bendir það til þess að barnafjölskyldur séu í auknum mæli að flytja í nágrannasveitarfélög þar sem þjónusta við foreldra og ung börn sé betri. Hún sagði leikskólabiðlista hafa verið viðvarandi vandamál í borginni og fjölskyldur hafi mjög mismunandi þarfir. Sumir foreldrar vilji dagforeldra, aðrir leikskóla og sumir vilji geta verið lengur heima með börnin sín.
Styrkja þarf dagforeldra og opna vinnustaðaleikskóla
Hildur sagði dagforeldrum hafa fækkað verulega á síðustu árum og gagnrýndi að borgaryfirvöld hefðu ekki stutt betur við stéttina. Sjálfstæðisflokkurinn vill samkvæmt henni styrkja dagforeldrakerfið og auka fjölbreytni í daggæsluúrræðum. Hún sagði einnig mikilvægt að fleiri fyrirtæki og stofnanir opni eigin leikskóla eða daggæslu fyrir börn starfsmanna. Þar nefndi hún Arion banka sem dæmi um fyrirtæki sem hafi farið þá leið. Að hennar mati gæti slíkt minnkað álag á fjölskyldur sem eyða löngum tíma í umferð á milli heimilis, vinnu og leikskóla.
Leikskólakerfið orðið of dýrt og flókið
Hildur sagði íslenska leikskólakerfið vera það dýrasta á Norðurlöndum. Hún nefndi að leikskólakennaranám hefði verið lengt úr þremur árum í fimm og mikill skortur væri orðinn á starfsfólki.
Samkvæmt henni vantar um 2.600 leikskólakennara á landsvísu en aðeins um 80 útskrifast árlega. Þá benti hún á að stór hluti starfandi leikskólakennara muni fara á eftirlaun á næstu árum. Sjálfstæðisflokkurinn vill því skoða ný úrræði, meðal annars sérstök dagheimili fyrir yngstu börnin sem geti brúað bilið milli fæðingarorlofs og leikskóla. Hildur sagði einnig mikilvægt að foreldrar fái meira frelsi til að ákveða sjálfir hvaða lausnir henti þeirra fjölskyldu best.
Hlusta má á ítarlegri umfjöllun í spilaranum hér að neðan.