Atriði Norðlingaskóla en þar var jafnréttið í forgrunni
Hlíðaskóli og Norðlingaskóli tryggðu sér sæti í úrslitum Skrekks 2026 á þriðja og síðasta undanúrslitakvöldi keppninnar sem fram fór í Borgarleikhúsinu miðvikudagskvöldið 11. nóvember. Alls tóku 285 ungmenni þátt í atriðum kvöldsins og hefur þátttakendafjöldi í keppninni í ár verið 791.
Níu grunnskólar tóku þátt í undanúrslitakvöldinu. Þeir voru Austurbæjarskóli, Fellaskóli, Hagaskóli, Háteigsskóli, Hlíðaskóli, Hólabrekkuskóli, Ingunnarskóli, Norðlingaskóli og Ölduselsskóli.
Tjáning og réttindabarátta kvenna í siguratriðunum
Hlíðaskóli komst áfram með atriðið Heimsendir, sem fjallar um mikilvægi þess að tjá hugsanir sínar og tilfinningar áður en það er orðið of seint. Í atriðinu er jafnframt lögð áhersla á að það sé í lagi að vera hræddur.
Í atriði Hlíðarskóla var þemað tjáning
Norðlingaskóli tryggði sér sæti í úrslitum með atriðinu Frjálsari í gær, sem fjallar um skerðingu á réttindum kvenna. Atriðið er samið til heiðurs konum víða um heim sem hafa barist fyrir réttindum kvenna.
Sex skólar hafa tryggt sér sæti í úrslitum
Með úrslitum miðvikudagskvöldsins liggur fyrir hvaða sex skólar hafa komist áfram úr undanúrslitum Skrekks 2026.
Á fyrsta undanúrslitakvöldinu, mánudaginn 9. nóvember, komust Breiðholtsskóli og Klébergsskóli áfram. Breiðholtsskóli keppti með atriðið Dulan, sem sækir innblástur í íslenskar vögguvísur og draugasögur, en Klébergsskóli flutti atriðið Sveitin er geitin, sem fjallar um líkindi lífsins í sveit og borg.
Á öðru undanúrslitakvöldinu, þriðjudaginn 10. nóvember, tryggðu Árbæjarskóli og Langholtsskóli sér sæti í úrslitum. Árbæjarskóli flutti atriðið Bestu ár ævi þinnar, um mótsagnakenndar ráðleggingar sem unglingar fá, en Langholtsskóli keppti með Frelsinu fögnum, sem fjallar um frelsi barna og áhrif reglna fullorðinna á gleði barnæskunnar.
Hlíðaskóli og Norðlingaskóli bætast nú í þennan hóp og munu skólarnir sex keppa til úrslita í Skrekk 2026.