Arnþrúður Karlsdóttir ræddi við Sólveigu Hákonardóttur, og Hjördísi Stefánsdóttur, fyrrverandi kennara og skólastjóra Húsmæðraskólans á Laugum í síðdegisútvarpinu í dag um Húsmæðraskólann í Reykjavík og það hlutverk sem slíkt nám gegndi í lífi ungra kvenna fyrir 6 áratugum. Fram kom að skólinn hafi veitt bæði verklega færni og mikilvægan undirbúning fyrir fullorðinsárin á tímum þegar heimilisrekstur var mun umfangsmeiri en nú. Hlusta má á þáttinn í spilaranum hér að neðan.
Menntun sem þótti besta veganestið
Sólveig og Hjördís útskrifuðust úr Húsmæðraskólanum í Reykjavík árið 1966 eftir að hafa flust suður frá Húsavík til náms. Að þeirra sögn litu margir foreldrar á þeim tíma svo á að húsmæðraskólanám væri ein besta menntun sem stúlkum stæði til boða. Þar lærðu þær matreiðslu, saumaskap, prjónaskap, borðsiði og ýmis önnur verk sem talin voru nauðsynleg til að reka heimili.
Fyrir margar stúlkur af landsbyggðinni var námið jafnframt fyrsta reynslan af því að flytja að heiman og takast á við nýtt umhverfi. Skólavistin fól því ekki aðeins í sér bóklegt og verklegt nám heldur einnig mikilvæga reynslu af sjálfstæðu lífi og leið til að bjarga sjálfum sér.
Kennslan náði langt út fyrir heimilisstörf
Í umræðunni kom fram að námið hafi verið mun víðtækara en margir geri sér grein fyrir í dag. Nemendur lærðu ekki aðeins að elda og sauma heldur einnig borðsiði, framkomu, þrif og meðferð á þvotti og skipulag heimilisreksturs og samskipti við annað fólk.
Markmiðið var að búa nemendur undir ábyrgð fullorðinsáranna og kenna þeim að vinna skipulega og sjálfstætt. Þær sögðu að kunnátta í daglegum verkum hefði verið talin mikilvægur þáttur í almennri menntun og skólinn hefði lagt áherslu á vandvirkni og góða umgengni ásamt því að efla verkvit.
Sjálfstæði og ábyrgð sem enn skipta máli
Hjördís sagði að húsmæðraskólanámið hefði orðið grunnur að frekara námi hennar í hússtjórnarkennslu og síðar störfum við kennslu við Verkmenntaskólann á Akureyri og skólastjórn við Húsmæðraskólann á Laugum í Reykjadal. Sólveig lagði sömuleiðis áherslu á að menntunin hefði nýst henni vel á starfsferli sínum innan matreiðslu- og veitingageirans en hún hefði verið önnur konan sem útskrifaðist frá Matreiðslu og veitingaskólanum.
Þær töldu að þótt samfélagið hefði tekið miklum breytingum væru mörg þeirra gilda sem skólinn lagði áherslu á enn mikilvæg. Sjálfsbjargarviðleitni, ábyrgð, góð umgengni og hæfni til að sjá um eigið heimili væru eiginleikar sem nýtast jafnt konum sem körlum. Að þeirra mati var stærsti lærdómurinn sá að kunna að standa á eigin fótum og takast af öryggi á við verkefni daglegs lífs.
Hlusta má á ítarlegri umfjöllun í spilaranum hér að neðan.