Pétur Gunnlaugsson ræddi við Vilhjálm Birgisson, formann Verkalýðsfélags Akraness og Starfsgreinasambands Íslands í síðdegisútvarpinu um efnahagslegt mikilvægi hvalveiða. Vilhjálmur sagði hvalveiðar skila umtalsverðum gjaldeyristekjum og skapa vel launuð störf sem hafi veruleg áhrif á atvinnulíf og skatttekjur í nærumhverfi Hvalstöðvarinnar í Hvalfirði. Hlusta má á þáttinn í spilaranum hér að neðan.
Hvalveiðar fæla ferðamenn ekki frá landinu
Vilhjálmur rifjaði upp að þegar hvalveiðar voru heimilaðar á ný árið 2009. Andstæðingar þeirra hefðu spáð því að ferðaþjónustan yrði fyrir verulegu áfalli. Þær spár hafi hins vegar ekki ræst heldur hafi ferðamönnum þvert á móti fjölgað verulega á árunum sem fylgdu. Því eigi fullyrðingar um að hvalveiðar fæli ferðamenn frá landinu sér enga stoð í raunveruleikanum.
Hann sagði útflutningsverðmæti hvalaafurða hafa numið um 11 milljörðum króna frá árinu 2011. Að hans sögn skili stór hluti þeirra tekna sér beint inn í íslenskt atvinnulíf, meðal annars til sveitarfélaga, flutningafyrirtækja, þjónustuaðila og annarra fyrirtækja sem tengjast starfseminni.
Vel launuð vertíðarstörf
Vilhjálmur sagði tekjumöguleika starfsfólks á hvalvertíð vera mjög mikla og einstaklingar gætu haft allt að 2ja milljóna króna mánaðarlaun á meðan vertíð stæði yfir. Hann tók þó fram að um væri að ræða krefjandi störf þar sem unnið væri langa vinnudaga þegar aðstæður leyfðu og því fylgdi mikið vinnuframlag. Á móti kæmi að þegar bræla væri á miðunum væru menn í fríi á fullum launum.
Að mati Vilhjálms eru hvalveiðar mikilvæg atvinnugrein sem skapi verðmæti úr náttúruauðlind sem nýtt sé á grundvelli vísindalegrar ráðgjafar. Hann sagði mikilvægt að Ísland nýtti auðlindir sínar með ábyrgum hætti til að skapa störf, gjaldeyristekjur og skatttekjur sem styrktu rekstur samfélagsins.
Hlusta má á ítarlegri umfjöllun í spilaranum hér að neðan.