Icelandair hefur stofnað nýtt dótturfélag í Vilníus í Litáen sem mun sinna skipulagi og eftirliti með viðhaldi flugvéla í langtímaleigu hjá erlendum viðskiptavinum Loftleiða, leiguflugsarms félagsins. Nýja félagið ber heitið Icelandair Third Party Technical Services og er hluti af stefnu Icelandair um að efla og þróa leiguverkefni sín og aðgreina þau betur frá annarri starfsemi samstæðunnar.
Verkefnin færð frá Íslandi
Sambærileg verkefni hafa hingað til verið unnin á skrifstofu Icelandair á Íslandi. Með breytingunni er þessum hluta starfseminnar útvistað til Litáens. Samkvæmt upplýsingum sem Icelandair hefur sent til Invest Lithuania er gert ráð fyrir að fimmtán manns starfi á skrifstofunni í Vilníus fyrir lok árs.
Engar uppsagnir vegna breytinganna
Guðni Sigurðsson, upplýsingafulltrúi Icelandair, sagði í viðtali við fjölmiðla í dag að engar uppsagnir hafi orðið á skrifstofu félagsins í Hafnarfirði vegna útvistunarinnar.