Arnþrúður Karlsdóttir ræddi við Jón Pétur Zimsen, þingmann Sjálfstæðisflokksins og fyrrverandi skólastjóra í síðdegisútvarpinu um innflytjendamál og áhrif þeirra á skólakerfið. Jón Pétur sagði innflytjendapakka ESB munu auka álagið á íslenska skóla og lagði áherslu á að mikill fjöldi barna sem kæmi inn í skólakerfið án íslenskukunnáttu kallaði á góðan undirbúning og markvissa aðlögun. Hlusta má á þáttinn í spilaranum hér að neðan.
Fjöldinn skiptir máli
Jón Pétur sagði innflytjendapakka ESB hafa mætt mikilli andstöðu meðal aðildarríkja og ástæðan væri meðal annars sú að ríkin sæju hvaða áhrif mikill fjöldi innflytjenda hefði á samfélög þeirra. Hann sagði mikilvægt að fólk fengi tíma og aðstæður til að aðlagast samfélaginu sem það flytti til.
Sama ætti við þegar börn kæmu inn í skólakerfið. Ef fjöldinn yrði mikill á skömmum tíma myndi það auka álag á skólana og gera kennurum erfiðara fyrir að sinna bæði nýjum nemendum og þeim sem fyrir væru.
Íslenskan forsenda aðlögunar
Jón Pétur lagði mikla áherslu á íslenskukunnáttu. Börn sem kæmu til landsins þyrftu að læra tungumálið til að geta tekið fullan þátt í kennslu og samfélaginu. Ef nemandi skildi ekki íslensku yrði mun erfiðara fyrir hann að fylgja kennslunni og fyrir kennarann að sinna öllum nemendum bekkjarins.
Arnþrúður ræddi jafnframt þá stöðu sem kennarar væru komnir í þegar börn með litla eða enga íslenskukunnáttu kæmu inn í almenna bekki. Spurningin væri hvernig tryggja mætti að börnin fengju þá aðstoð sem þau þyrftu án þess að kennslan fyrir aðra nemendur liði fyrir.
Undirbúningur áður en farið er í almenna bekki
Arnþrúður spurði hvort hægt væri að hafa sérstakt fornám eða undirbúning fyrir börn sem væru nýkomin til landsins áður en þau færu að fullu inn í almenna kennslu. Jón Pétur sagði ekkert standa í vegi fyrir slíku fyrirkomulagi.
Þar væri hægt að leggja sérstaka áherslu á íslenskuna og undirbúa börnin fyrir þátttöku í skólastarfinu. Markmiðið væri að þau hefðu betri forsendur til að fylgja kennslunni þegar þau kæmu inn í almenna bekki.
Jón Pétur sagði aðlögun þurfa bæði góðan undirbúning og tíma. Ef tekið væri á móti of mörgum á of skömmum tíma yrði erfiðara að tryggja þá aðlögun sem þyrfti og álagið á skólakerfið myndi aukast.
Hlusta má á ítarlegri umfjöllun í spilaranum hér að neðan.