Pétur Gunnlaugsson ræddi við Björn Inga Stefánsson, eiganda Hótel Kríuness og Einar Gaut Steingrímsson, lögmann í síðdegisútvarpinu í dag, um Jesú helgi sem fram fer í Reykjavík dagana 12.–15. júní. Aðstandendur segja markmið samkomunnar vera að kynna kristna trú, skapa vettvang fyrir samfélag og fræðslu og gefa fólki kost á að kynna sér kenningar um Jesú Krist og kristna trú, óháð trúarlegum bakgrunni. Hlusta má á þáttinn í spilaranum hér að neðan.
Framhald af samkomu sem vakti mikinn áhuga
Að sögn Björns Inga er Jesú helgin framhald sambærilegrar samkomu sem haldin var eftir síðustu áramót. Þá komu hingað til lands gestir frá Vineyard-hreyfingunni í Bandaríkjunum og sóttu um 100 manns viðburðinn. Aðstandendur ákváðu í kjölfarið að halda aðra samkomu og bjóða aftur hingað erlendum gestum sem starfa innan Vineyard-hreyfingarinnar. Markmiðið sé að skapa vettvang þar sem fólk geti kynnt sér kristna trú, átt samfélag við aðra og hlýtt á fræðslu og reynslusögur tengdar trúarlífi.
Fræðsla um trú, lækningar og kraftaverk
Dagskráin hefst föstudagskvöldið 12. júní í húsnæði Kristkirkjunnar við Fossaleyni 14 í Grafarvogi. Þar verður meðal annars boðið upp á lofgjörðartónlist, vitnisburði og samveru.
Á laugardeginum verður sérstök kennsla þar sem fjallað verður um efni sem tengjast kristinni trú, meðal annars lækningar, kraftaverk og aðra reynslu sem þátttakendur telja tengjast yfirnáttúrulegum atburðum. Erlendu gestirnir frá Bandaríkjunum munu taka þátt í þeirri kennslu ásamt íslenskum skipuleggjendum samkomunnar.
Á sunnudeginum verður guðsþjónusta áður en dagskránni lýkur með samkomu í húsnæði Vegarins á Smiðjuvegi.
Opið öllum sem vilja kynna sér kristna trú
Björn og Einar sögðu að lögð yrði áhersla á tónlist, bænir, kennslu og frásagnir fólks af persónulegri trúarreynslu. Samhliða því verði gestum gefið tækifæri til að ræða við þátttakendur og bera fram spurningar um kristna trú og boðskap Jesú Krists.
Þátttaka í Jesú helginni er ókeypis og sögðu skipuleggjendur að allir væru velkomnir, hvort sem þeir skilgreindu sig sem kristna eða ekki. Samkoman sé ætluð jafnt þeim sem séu virkir í kirkjustarfi og þeim sem hafi áhuga á að kynna sér kristna trú og hlutverk Jesú Krists í kristinni kenningu.
Hlusta má á ítarlegri umfjöllun í spilaranum hér að neðan.