
Arnþrúður Karlsdóttir ræddi við Ragnar Guðmundsson, matreiðslumeistara og fyrrum veitingamann í Laugaás og Eirík Inga Friðgeirsson, matreiðslumeistara og fyrrum veitingamann á Hótel Holti í Jólaþættinum á Útvarpi Sögu um jólahlaðborð og hátíðarmat á veitingastöðunum sem fjölskyldur þeirra koma að. Hefðbundin jólahlaðborð eru nú endurvakin í Perlunni í Öskjuhlíð, auk þess sem boðið er upp á jólamatseðla á Eiríkssyni Brasserie við Laugaveg 77 og jólaveislur í Grósku. Þar er áhersla lögð á íslenskar matarhefðir, heimalagaða rétti og nýjungar í matargerð. Hlusta má á þáttinn í spilaranum hér að neðan.
Gamla jólahlaðborðið endurvakið í Perlunni
Eiríkur sagði lengi hafa staðið til að endurvekja hin vinsælu hlaðborð sem áður einkenndu veitingarekstur Perlunnar. Til þess hefði veitingasölunum verið breytt í samstarfi við rekstraraðila hússins, meðal annars með nýjum húsgögnum, teppum og samræmdu útliti sem minnti á fyrstu ár Perlunnar.
Rýmið hentaði sérstaklega vel fyrir stór jólahlaðborð þar sem yfir 200 gestir gætu komið saman. Boðið væri upp á hlaðborðin á ákveðnum föstudögum og laugardögum og nauðsynlegt væri að bóka sæti fyrirfram, meðal annars í gegnum Dineout.
Heimalöguð síld og hefðbundnir jólaréttir
Á jólahlaðborðinu í Perlunni er meðal annars hangikjöt, kalkúnn, purusteik, hreindýrapaté, villibráðarréttir og grafinn og reyktur lax.
Sérstök nýjung er síld með appelsínulíkjör sem matreiðslumennirnir hafa þróað úr síld sem fengin er frá Hornafirði. Eiríkur sagði síldarréttina útbúna frá grunni, bæði maríneraða síld og kryddsíld, samkvæmt þeirri hefð sem þeir hefðu fylgt í gegnum árin.
Ragnar nefndi einnig heimalagað rauðkál sem hefði lengi verið eitt af einkennum Laugaáss og væri áfram á boðstólum á veitingastöðum fjölskyldnanna.
Franskur Bresse-kjúklingur á jólaseðli Eiríkssonar Brasserie
Á Eiríkssyni Brasserie við Laugaveg 77 er boðið upp á 4 rétta jólaseðil þar sem meðal annars er þjórsárlax, humarravíólí og franskur Bresse-kjúklingur.
Eiríkur útskýrði að humarravíólí væri ítalskur pastaréttur þar sem humar væri lokaður inni í deigi. Bresse-kjúklingurinn kæmi hins vegar frá samnefndu héraði í Frakklandi og væri þekktur fyrir sérstakt eldi og gæði.
Á staðnum er jafnframt jólabröns á fimmtudögum, föstudögum og laugardögum. Gestir velja þar úr nokkrum smáréttum sem bornir eru fram á borðið.
Jólaveislur og skata á Þorláksmessu hjá Eiríksdóttur í Grósku
Í Eiríksdóttur í Grósku er boðið upp á hádegisverð á virkum dögum og jólahlaðborð fyrir fyrirtæki og hópa á kvöldin. Ragnar sagði veitingasalinn sérstakan, meðal annars vegna norðurljósalýsingar í loftinu.
Jólahlaðborðin byggjast á sambærilegum réttum og í Perlunni, með áherslu á hefðbundinn jólamat og fjölbreytt hráefni.
Ragnar og Guðmundur taka á móti gestum í Skötuna á Þorláksmessu
Arnþrúður spurði sérstaklega um Skötuna á Þorláksmessu. Ragnar staðfesti að hún yrði á boðstólum hjá Eiríksdóttur í Grósku og einnig hjá Eiríksson á Laugavegi 77. Ragnar sagði að hann og Guðmundur sonur hans veitingamaður, myndu sjálfir mæta í kokkagöllunum og taka á móti gestum, en nauðsynlegt væri að panta með fyrirvara.
Hlusta má á ítarlegri umfjöllun í spilaranum hér að neðan.
