Arnþrúður Karlsdóttir ræddi við Jón Gnarr, þingmann utan flokka, listamann og fyrrverandi borgarstjóra, í síðdegisútvarpinu, um áherslur Viðreisnar í utanríkismálum og tengsl Íslands við Evrópu og Bandaríkin. Jón sagði sér stundum hafa fundist Þorgerður Katrín Gunnarsdóttir, formaður Viðreisnar og utanríkisráðherra, uppteknari af Evrópu en því sem gerðist þar en málefnum hér heima. Hlusta má á þáttinn í spilaranum hér að neðan.
Meiri áhersla á Evrópu
Arnþrúður vakti máls á áherslum formanns Viðreisnar og spurði hvort Jón hefði upplifað að meiri athygli færi í Evrópu en það sem væri að gerast innanlands. Honum hafði stundum fundist svo vera. Um leið varaði hann við því að Ísland fjarlægðist Bandaríkin eða að umræðunni væri stillt upp þannig að velja þyrfti á milli þeirra og Evrópu.
Jón sagðist kunna vel við hugmyndina um vestrænt samfélag sem byggði á samstarfi Evrópu og Bandaríkjanna. Ísland hefði lengst af átt góð samskipti við Bandaríkin og ekki ætti að láta afstöðu til einstakra forseta ráða langtímasambandi þjóðanna.
Vill leggja rækt við tengsl Íslands við bæði Evrópu og Bandaríkin
Hann vildi ekki velja annað hvort Evrópu eða Bandaríkin heldur leggja rækt við tengslin við bæði.
Bandaríkin væru mikilvægasti bandamaður Íslands og einnig þyrfti að rækta góð samskipti við Kanada. Jón vísaði jafnframt til reynslu sinnar sem formaður Vestnorræna ráðsins og samskipta við Grænlendinga.
Að hans mati væri mikilvægt að horfa á Norður-Atlantshafið í stærra samhengi og gæta þess að Ísland lokaði ekki dyrum gagnvart samstarfi vestur um haf.
Formaðurinn talar um Trumpisma með neikvæðum formerkjum
Arnþrúður rifjaði upp að formaður Viðreisnar hefði fyrir kosningar talað með neikvæðum hætti um Trumpisma og spurði hvort jákvæð afstaða Jóns til Bandaríkjanna og sú staðreynd að hann skilgreindi sig ekki sem eindreginn Evrópusinna hefði getað valdið núningi innan flokksins.
Hann útilokaði það ekki. Vel gæti verið að sumt af því sem hann segði ylli fólki innan flokksins hugarangri.
Jón sagðist sjá gríðarleg tækifæri í virku sambandi Íslands og Bandaríkjanna. Stjórnvöld væru að hans mati að mestu á sömu línu um mikilvægi góðra tengsla en sjálfur vildi hann ganga lengra og styrkja böndin enn frekar. Hann vísaði þar meðal annars til varnarsamnings Íslands og Bandaríkjanna og aðildarinnar að NATO.
Bandaríkin stærri en sitjandi forseti
Jón lagði áherslu á að Bandaríkin mætti ekki skilgreina eingöngu út frá því hver sæti í forsetaembættinu hverju sinni.
Hann hefur sjálfur búið þar og lýsti miklum hlýhug til landsins og bandarísku þjóðarinnar. Þótt hann sæi ýmsa galla á bandarísku samfélagi bæri hann mikið traust til þjóðarinnar og sérstöðu hennar.
Arnþrúður og Jón voru því sammála um að samskipti Íslands við Bandaríkin skiptu miklu máli. Megináhersla hans var að Ísland ætti ekki að stilla Evrópu og Bandaríkjunum upp sem tveimur valkostum heldur halda sterkum tengslum í báðar áttir.
Hlusta má á ítarlegri umfjöllun í spilaranum hér að neðan.