Arnþrúður Karlsdóttir ræddi við Jón Pétur Zimsen, þingmann Sjálfstæðisflokksins og fyrrverandi skólastjóra í síðdegisútvarpinu á Útvarpi Sögu í dag, um fyrirhugaðar breytingar á námsmati í grunnskólum. Jón Pétur sagðist ekki skilja hörð viðbrögð kennaraforustunnar við því að taka upp tölustafi í stað bókstafa, enda hafi foreldrar og kennarar kallað eftir breytingum. Jón taldi breytinguna geta gefið nemendum og foreldrum skýrari upplýsingar um námslega stöðu. Mun stærra verkefni væri að bæta námsárangur íslenskra nemenda. Hlusta má á þáttinn í spilaranum hér að neðan.
Tölustafir gefa skýrari mynd
Jón Pétur sagðist hafa orðið undrandi á þeirri hörðu gagnrýni sem breytingin hefði fengið. Eftir áratuga störf sem kennari og skólastjóri sæi hann kosti við að námsmatið yrði nákvæmara.
Hann útskýrði að gamla B-einkunnin hefði náð yfir mjög breitt bil. Nemandi sem fengi B gæti staðið mun nær neðri mörkum einkunnarinnar en annar nemandi sem einnig fengi B. Tölustafir gæfu mun nákvæmari upplýsingar um stöðu hvers nemanda.
Samkvæmt nýja kerfinu væri kvarðinn í raun frá 4 upp í 10. Jón Pétur sagði einkunnir frá 7 til 10 gefa aðgang að öðru hæfniþrepi í framhaldsskóla en lægri einkunn gæti þýtt að nemandi þyrfti lengri námsleið eða annars konar úrræði. Þannig skipti máli að nemendur vissu nákvæmlega hvar þeir stæðu þegar grunnskólanum lyki.
Arnþrúður lagði áherslu á að skýr staða skipti sérstaklega máli þegar nemendur væru komnir í 9. og 10. bekk. Nemandi sem hefði árum saman fengið B þyrfti að vita betur hvernig hann stæði áður en kæmi að framhaldsskóla.
Mælikvarðinn leysir þó ekki stærsta vandann
Jón Pétur líkti breytingunni við að breyta hraðamæli úr kílómetrum á klukkustund yfir í metra á sekúndu. Mælikvarðinn breyttist en hraðinn væri sá sami.
Þótt tölustafir gæfu nákvæmari upplýsingar myndu þeir því ekki bæta kunnáttu nemenda. Þar þyrfti að horfa til kennslunnar og þess hvort börn næðu þeirri þekkingu og færni sem ætlast væri til.
Arnþrúður spurði hvers vegna breyting á einkunnakerfinu hefði kallað fram jafn hörð viðbrögð þegar mun alvarlegri vandamál blöstu við í íslensku skólakerfi. Námsmat ætti að sýna hvar nemandinn stæði en síðan þyrfti að bregðast við ef hann væri að dragast aftur úr. Spurði Arnþrúður hvort það hafi komið einhverjar tillögur frá forystu kennara þegar PISA niðurstöður hafa verið slakar. Sagði Jón Pétur lítið hafa farið fyrir slíkum tillögum því miður.
Slakur námsárangur mun stærra mál
Niðurstöður íslenskra nemenda í lesskilningi, stærðfræði og náttúruvísindum sýndu mun stærri vanda. Jón Pétur taldi skýrari mælingar geta hjálpað til við að greina veikleikana en þær væru aðeins verkfæri til þess.
Mestu skipti hvað gert væri þegar í ljós kæmi að nemendur næðu ekki tilskildum árangri. Þá þyrfti að skoða kennsluna og grípa til aðgerða í stað þess að láta breytinguna á sjálfum einkunnakvarðanum verða að aðalatriðinu.
Hlusta má á ítarlegri umfjöllun í spilaranum hér að neðan.