Atvinnustefnuráð hefur birt sína fyrstu stöðuskýrslu þar sem ný atvinnustefna Íslands og aðgerðaáætlun hennar eru metnar. Í skýrslunni er frumkvæði stjórnvalda til að móta heildstæða atvinnustefnu fagnað, en jafnframt lögð áhersla á að árangur hennar ráðist af markvissri og skilvirkri innleiðingu.
Ráðið telur að atvinnustefnan byggi á traustum greiningum og taki mið af þeim efnahagslegu og samfélagslegu breytingum sem Ísland stendur frammi fyrir. Sérstaklega er bent á mikilvægi aukinnar framleiðni, útflutnings og viðnámsþróttar íslensks hagkerfis til lengri tíma.
Innleiðingin ráði úrslitum
Meginniðurstaða skýrslunnar er að næsti áfangi verði lykillinn að því hvort stefnan skili tilætluðum árangri. Atvinnustefnuráð fagnar því að aðgerðaáætlun fylgi stefnunni en leggur áherslu á að skýrar afurðir, ábyrgðarskipting og mælanleg markmið séu nauðsynleg til að fylgjast með framvindu og árangri.
Robert-Jan Smits, formaður atvinnustefnuráðs, segir stjórnvöld hafa stigið mikilvægt skref með framlagningu atvinnustefnunnar en að framkvæmd hennar muni ráða úrslitum.
Þörf fyrir frekari umbætur
Í skýrslunni bendir ráðið jafnframt á nokkra málaflokka sem fá takmarkaða umfjöllun í atvinnustefnunni en geti haft veruleg áhrif á árangur hennar. Þar nefnir ráðið meðal annars þörf fyrir umbætur á vinnumarkaði, stöðugra gengi krónunnar, samkeppnishæfara skattaumhverfi og öflugri gagna- og greiningargetu til stuðnings við stefnumótun stjórnvalda.
Mikilvægur þáttur í efnahagsþróun landsins
Atvinnustefnuráð starfar sjálfstætt og hefur það hlutverk að veita stjórnvöldum ráðgjöf um mótun og framkvæmd atvinnustefnu. Með stöðuskýrslunni vill ráðið stuðla að því að atvinnustefnan verði ekki aðeins stefnumarkandi plagg heldur raunverulegt verkfæri til að styrkja samkeppnishæfni íslensks atvinnulífs og stuðla að sjálfbærum hagvexti til framtíðar.