Greining mennta- og barnamálaráðuneytisins á stöðu stærðfræðikennslu í grunn- og framhaldsskólum bendir til þess að ekki dugi að endurnýja námsefni eitt og sér. Niðurstaðan er að ráðast þurfi í heildstæðar umbætur á stærðfræðinámi með breytingum á námskrá, kennsluefni, námsmati og stuðningi við kennara.
Greiningin byggir meðal annars á svörum 663 grunnskólakennara og 89 framhaldsskólakennara, auk samráðs við skólasamfélagið og rýni á námskrám, námsgögnum og fyrri skýrslum.
Kennarar halda kerfinu uppi
Samkvæmt greiningunni telja margir kennarar að núverandi kjarnaefni sé orðið úrelt og stuðningur við kennsluna hafi ekki þróast í takt við þarfir skólanna.
Um 76% grunnskólakennara segjast oft þurfa að útbúa eða afla sér viðbótarefnis og 84% nota reglulega eigið kennsluefni. Aðeins 30% telja aðalnámskrá styðja vel við skýra framvindu í stærðfræðinámi.
Í skýrslunni segir að kennarar haldi kerfinu að verulegu leyti gangandi með eigin undirbúningi og aðlögun kennslunnar.
Framhaldsskólar sjá veikan undirbúning
Greiningin sýnir einnig að skil milli grunn- og framhaldsskóla séu veik. Enginn framhaldsskólakennari sem svaraði könnuninni taldi undirbúning nýnema mjög góðan og 62% mátu hann frekar eða mjög veikan. Þá sögðu aðeins 10% að samskipti grunn- og framhaldsskóla væru markviss.
Stærðfræði verði forgangsmál
Mennta- og barnamálaráðuneytið leggur til að stærðfræði verði skilgreind sem forgangsverkefni næstu þrjú árin.
Gert er ráð fyrir að nýtt kjarnaefni verði valið á grundvelli faglegra gæðaviðmiða og að innleiðing hefjist á miðstigi grunnskóla með það að markmiði að skapa samfellu í stærðfræðinámi frá 1. til 10. bekkjar.
jafnframt er lagt til að fjárfest verði í nýju námsefni, innleiðingu, námsmati, starfsþróun kennara og auknu samstarfi milli grunn- og framhaldsskóla.
Veikar PISA-niðurstöður kalla á aðgerðir
Í greiningunni er bent á að áhyggjur kennara, veikar niðurstöður íslenskra nemenda í PISA-prófum í stærðfræði, skortur á sérhæfðum stærðfræðikennurum og aukin áhersla á STEM-greinar bendi öll til þess að efla þurfi stærðfræðikennslu mun fyrr á skólagöngunni.
Ráðuneytið segir markmiðið vera að tryggja kennurum betri stuðning, skapa meiri samfellu í námi óháð búsetu og byggja upp sterkari grunn í stærðfræði fyrir nemendur um land allt.