Arnþrúður Karlsdóttir ræddi við Guðmund Ólafsson hagfræðing í Síðdegisútvarpinu, um stjórnmál, kosningar og stöðu lýðræðis á Íslandi. Í viðtalinu lagði Guðmundur ríka áherslu á að breyta þurfi fyrirkomulagi kosninga, meðal annars með því að halda þær annað hvert ár og auka verulega hlut þjóðaratkvæðagreiðslna. Hlusta má á þáttinn í spilaranum hér að neðan.
Vill tíðari kosningar til að auka ábyrgð
Í máli Guðmundar kom fram að 4 ára kjörtímabil skapi of mikið svigrúm fyrir kjörna fulltrúa til að starfa án nægilegs aðhalds. Hann sagði að með því að halda kosningar, annað hvert ár, yrði meiri hreyfing á kerfinu og kjósendur fengju raunhæfari möguleika til að bregðast við. Guðmundur taldi að slíkt myndi draga úr áhrifum þeirra sem hefðu ekki staðið sig í starfi og tryggja að þeir sem nytu ekki trausts kjósenda hyrfu fyrr af vettvangi stjórnmálanna.
Þjóðaratkvæðagreiðslur verði reglulegur þáttur
Guðmundur lagði einnig til að þjóðaratkvæðagreiðslur yrðu fastur liður í stjórnskipan landsins og færu fram oftar en nú, jafnvel tvisvar á ári. Hann sagði að almenningur ætti að fá beina aðkomu að mikilvægum ákvörðunum í stað þess að þær væru einvörðungu teknar af kjörnum fulltrúum. Í umræðunni kom fram að hann teldi að slíkt fyrirkomulag myndi styrkja lýðræðið og auka traust almennings á stjórnvöldum.
Hugtökin hægri og vinstri notuð til stimplunar
Guðmundur Ólafsson vék einnig að hugmyndafræðilegri umræðu og sagði hugtökin hægri og vinstri ekki lengur hafa raunverulega merkingu í nútímasamfélagi. Arnþrúður benti á að þau væru notuð sem stimplar í pólitískri umræðu, það væri algengt að heyra “hægri öfga flokkur” til þess að leggja neikvæða áherslu á viðkomandi. Að mati Guðmundar endurspeglar nútímakerfi blandað hagkerfi þar sem bæði opinber og einkarekin starfsemi eru samofin sem geri einföld flokkunarkerfi úrelt.
Gagnrýni á framkvæmd stjórnarskrármála
Í viðtalinu kom einnig fram gagnrýni á að niðurstaða þjóðaratkvæðagreiðslu um nýja stjórnarskrá hafi ekki verið innleidd. Guðmundur sagði að það veikti traust á stjórnmálakerfinu og sýni að vilji kjósenda hafi ekki fengið að ráða för. Hann taldi að aukin bein þátttaka almennings, meðal annars í gegnum þjóðaratkvæðagreiðslur, gæti komið í veg fyrir slíka stöðu í framtíðinni.
Hlusta má á ítarlegri umfjöllun í spilaranum hér að neðan.