Kona á fertugsaldri hlaut alvarlega áverka í líkamsárás í íbúð í fjölbýlishúsi í Kópavogi í gærkvöld. Karlmaður á fimmtugsaldri var handtekinn á vettvangi og er í haldi lögreglu vegna rannsóknar málsins.
Lögreglan á höfuðborgarsvæðinu greindi frá þessu síðdegis í dag.
Maðurinn er grunaður um að hafa ráðist á konuna inni í íbúðinni. Hún var flutt á slysadeild til aðhlynningar en lögregla segir áverka hennar alvarlega.
Farið fram á gæsluvarðhald
Hinn grunaði var handtekinn á vettvangi og hefur verið í haldi lögreglu vegna rannsóknarinnar.
Lögregla hyggst fara fram á gæsluvarðhald yfir honum síðar í dag.
Ekki hafa verið veittar upplýsingar um nánari tildrög árásarinnar eða tengsl mannsins og konunnar.
Lögreglan segir ekki unnt að veita frekari upplýsingar um málið að svo stöddu.