Pétur Gunnlaugsson ræddi við Pál Vilhjálmsson, blaðamann og bloggara, í síðdegisútvarpinu, um stöðu fjölmiðla og framtíð RÚV. Páll spáir því að krafan um að skera RÚV niður við trog verði sífellt sterkari og segir erfitt að réttlæta að ríkið verji um 6 milljörðum króna á ári til reksturs fjölmiðils sem þegar hefur mjög sterka stöðu á markaðnum. Hlusta má á þáttinn í spilaranum hér að neðan.
RÚV situr eitt eftir á sjónvarpsmarkaði
Pétur benti á að íslenskur fjölmiðlamarkaður hefði tekið miklum breytingum og RÚV væri orðið mun sterkara eftir að samkeppni frá Stöð 2 hvarf að mestu af hefðbundnum sjónvarpsmarkaði.
Páll sagði styrk RÚV bæði byggjast á opinberri fjármögnun og auglýsingatekjum en einnig breyttri fjölmiðlanotkun. Fólk sækti fréttir í auknum mæli á netið og miðlar á borð við Morgunblaðið, Vísi og DV væru þar sterkir. Staðan væri önnur á hefðbundnum sjónvarpsmarkaði þar sem RÚV sæti nánast eitt eftir.
Hann sagði spurninguna vera hversu lengi samfélagið sætti sig við að ríkið legði um 6 milljarða króna á ári í svo öflugan fjölmiðil. Slík yfirburðastaða ríkisfjölmiðils skapaði jafnframt hættu á að stjórnvöld freistuðust til að nýta sér áhrif hans.
Milljarðar gætu færst til annarra fjölmiðla
Sagði Páll erfitt að sjá milliveg þegar kæmi að framtíð RÚV. Annaðhvort þyrfti að skera reksturinn verulega niður eða breyta rekstrarforminu með róttækum hætti.
Pétur benti á að stjórnmálamenn skorti oft kjark til að ráðast í slíkar breytingar. Páll rifjaði þá upp hugmynd sem komið hefur fram frá þingmanni Miðflokksins um að skattgreiðendur fái sjálfir að ákveða hvaða fjölmiðlar njóti þess hluta opinbers stuðnings sem þeir leggja til.
Ef 1–2 milljarðar króna yrðu teknir úr fjármögnun RÚV og almenningi falið að ráðstafa þeim til fjölmiðla að eigin vali, gæti það að sögn Páls gjörbreytt íslenskum fjölmiðlamarkaði. Hann útilokar ekki að breytingar í þessa átt geti orðið á yfirstandandi kjörtímabili.
Fleiri netmiðlar í stað hefðbundins sjónvarps
Pétur og Páll ræddu einnig hvort nýir aðilar gætu komið inn á íslenskan sjónvarpsmarkað. Páll sagði þó þróunina frekar stefna í átt að myndbandsefni á netinu og hlaðvörpum en uppbyggingu nýrrar hefðbundinnar sjónvarpsstöðvar.
Morgunblaðið væri þegar farið að framleiða myndbandsefni í tengslum við hlaðvörp og þætti og tæknifyrirtæki með mikið fjármagn gætu einnig séð tækifæri á íslenskum markaði.
Páll sagði æskilegt að fjölmiðlum fjölgaði frekar en fækkaði. Róttækar breytingar á stöðu RÚV og dreifingu opinbers fjármagns gætu að hans mati skapað svigrúm fyrir fjölbreyttari fjölmiðlamarkað.
Hlusta má á ítarlegri umfjöllun í spilaranum hér að neðan.