Arnþrúður Karlsdóttir ræddi við Kristinn Sigurjónsson, rafmagns- og efnaverkfræðing og fyrrverandi háskólakennara í Síðdegisútvarpinu um orkuskipti í samgöngum og skipaflota landsins. Kristinn sagði að milljörðum króna hefðu verið varið í styrki og tilraunir til að knýja skip og flugvélar með rafmagni eða öðrum orkugjöfum án þess að tæknilegar forsendur hefðu verið raunhæfar. Hlusta má á þáttinn í spilaranum hér að neðan.
Hann sagði að þó rafbílar gætu hentað fyrir styttri innanbæjarferðir væri tæknin ekki komin nægilega langt til að knýja stór farartæki, langferðabíla, skip eða flugvélar með fullnægjandi árangri. Að hans mati hefðu fjármunir sem ætlaðir voru í orkuskiptaverkefni verið nýttir án þess að niðurstaðan skilaði raunverulegum árangri.
Telur stjórnvöld hafa gengið of langt í loforðum
Kristinn gagnrýndi að stjórnvöld hefðu lofað hraðari orkuskiptum en tæknin stæði undir. Þetta hefði leitt til þess að fé var varið í þróunarverkefni og styrki sem ekki hefðu leitt til viðvarandi lausna. Hann sagði að nauðsynlegt væri að leggja áherslu á raunhæf tæknileg skref í orkuskiptum í stað þess að setja fram pólitísk markmið sem ekki væri hægt að uppfylla. Hann benti á að bæði skip og flugvélar væru knúin af miklu afli og orkuþörfin langt umfram það sem núverandi rafhlöðutækni gæti staðið undir.
Vill beina fjármunum í framkvæmanleg verkefni
Að mati Kristins er þörf á að endurskoða stefnu stjórnvalda í orkuskiptum og beina fjármunum í framkvæmanleg verkefni sem byggja á tæknilegum forsendum sem þegar eru til staðar. Hann sagði að aðeins þannig mætti tryggja ávinning fyrir bæði atvinnulíf og umhverfi í stað þess að fjármunir nýtist í skammtímalausnir sem ekki standist tíma og prófanir.
Hlusta má á ítarlega umfjöllun í spilaranum hér að neðan.