Kristrún Frostadóttir forsætisráðherra tekur á miðvikudag á móti leiðtogum Grænlands og Færeyja á Íslandi þar sem meðal annars verður rætt um öryggismál á Norður-Atlantshafi og sameiginlega hagsmuni vestnorrænu landanna. Leiðtogarnir munu einnig kynna sér aðstæður á öryggissvæðinu á Keflavíkurflugvelli. Þetta kemur fram í fréttatilkynningu frá Forsætisráðuneytinu.
Jens Frederik Nielsen, formaður grænlensku landsstjórnarinnar, og Beinir Johannesen, lögmaður Færeyja, koma hingað til lands í boði Kristrúnar og funda með henni 7. október.
Þetta verður í fyrsta sinn sem leiðtogar Íslands, Grænlands og Færeyja koma sérstaklega saman í einu landanna þriggja til að ræða sameiginleg hagsmunamál.
Öryggismál á Norður-Atlantshafi til umræðu
Öryggismál verða meðal helstu viðfangsefna fundarins en auk samráðsfundar leiðtoganna þriggja verður farið á öryggissvæðið á Keflavíkurflugvelli.
Kristrún segir vestnorræna svæðið hafa verið áberandi í umræðu um alþjóðamál undanfarin misseri og að ríkin þrjú fari ekki varhluta af breyttri stöðu öryggismála á Norður-Atlantshafi.
„Við sem hér búum förum ekki varhluta af þeim kerfislægu öryggisáskorunum sem ríkja á Norður-Atlantshafi og tökum ábyrgð okkar þar alvarlega. Það er mikilvægt að við eigum samráð um stöðu þessara mála,“ segir Kristrún.
Hún segir jafnframt mikilvægt að ræða þau tækifæri sem felast í auknu vægi svæðisins.
Funda einnig með alþjóðlegum fjárfestum
Leiðtogarnir munu einnig funda með alþjóðlegum fjárfestum sem hafa beint sjónum sínum að fjárfestingartækifærum á vestnorræna svæðinu og Norðurslóðum.
Kristrún segir mikilvægt að ríkin þrjú ræði bæði sameiginlega hagsmuni sína og sérstöðu á Norður-Atlantshafi.
„Það er afar ánægjulegt að geta tekið á móti fulltrúum okkar næstu nágrannaþjóða og rætt við þá um sameiginlega hagsmuni okkar og sérstöðu hér í Norður-Atlantshafi og á Norðurslóðum,“ segir hún.
Fyrsta heimsókn beggja leiðtoganna eftir embættistöku
Heimsóknin verður jafnframt sú fyrsta til Íslands hjá bæði Nielsen og Johannesen frá því þeir tóku við embættum sínum.
Fundurinn er framhald af samskiptum vestnorrænu landanna eftir að Kristrún fór í fyrstu tvíhliða heimsóknir sínar sem forsætisráðherra til Þórshafnar í maí og Nuuk í október á síðasta ári.
Með fundinum á miðvikudag verður samstarfið fært á nýtt stig þar sem leiðtogar landanna þriggja koma saman sérstaklega til að ræða sameiginleg málefni Íslands, Grænlands og Færeyja.