Pétur Gunnlaugsson ræddi við Guðbjörn Guðbjörnsson stjórnsýslufræðing og óperusöngvara í síðdegisútvarpinu, um húsnæðismarkaðinn, leigubremsu og vaxtastigið. Guðbjörn sagði almenna leigubremsu ekki leysa vandann heldur þyrfti að byggja fleiri íbúðir og auka framboð félagslegs húsnæðis fyrir þá sem verst standa. Hlusta má á þáttinn í spilaranum hér að neðan.
Fleiri íbúðir í stað almennrar leigubremsu
Pétur vakti máls á umræðunni um leigubremsu og þeirri gagnrýni sem komið hefur fram á hana. Guðbjörn benti á að slíkar aðgerðir hefðu verið reyndar í ýmsum Evrópulöndum.
Hann hafnaði því að almenn leigubremsa væri lausnin á húsnæðisvandanum. Kjarninn væri að fjölga íbúðum og auka framboðið á markaðnum.
Pétur benti jafnframt á að þegar meiri verðmæti yrðu til í samfélaginu hefði það áhrif á fasteignaverð. Guðbjörn tók undir að verð fasteigna hækkaði samhliða auknum verðmætum.
Félagslegt húsnæði fyrir þá sem þurfa meiri hjálp
Auk almennrar húsnæðisuppbyggingar vill hann leggja meiri áherslu á félagslegt húsnæði.
Guðbjörn sagði ólíka hópa standa misvel á húsnæðismarkaði og suma þurfa meiri aðstoð en aðra. Betra væri að beina stuðningi að þeim sem væru illa staddir og tryggja þeim húsnæði á viðráðanlegum kjörum en að beita almennri leigubremsu á allan markaðinn.
Þannig mætti að hans mati hjálpa þeim sem mest þyrftu á því að halda án þess að grípa til almennrar verðstýringar á leigumarkaði.
Vextir þurfa að lækka án valdboðs
Pétur lagði áherslu á að almennt þyrfti að lækka vexti svo fólk gæti staðið undir húsnæðiskostnaði.
Guðbjörn tók undir að vaxtastigið þyrfti að lækka en hafnaði því að stjórnvöld ættu að ákveða vextina með valdboði.
Guðbjörn rifjaði upp að þegar hann var barn hefðu stjórnmálamenn reynt að stýra vöxtum með þeim hætti og verðbólgan farið úr böndunum. Slíkar lausnir hefðu ekki reynst vel.
Sjálfur vildi hann gjarnan sjá lægri vexti og sagði erfitt fyrir fólk að þurfa að greiða mun hærri vexti hér á landi en víða annars staðar.
Aukið framboð lykillinn að húsnæðisvandanum
Afstaða Guðbjörns var því að vinna þyrfti á húsnæðisvandanum með auknu framboði fremur en almennum hömlum á leiguverð.
Byggja þyrfti fleiri íbúðir, fjölga félagslegum úrræðum fyrir þá sem þyrftu sérstakan stuðning og skapa efnahagslegar forsendur fyrir lægri vöxtum án þess að ákveða þá með valdboði.
Hlusta má á ítarlegri umfjöllun í spilaranum hér að neðan.